يسەكەشيەۆ: ءاربىر ادەپسىز قىلىق ءۇشىن قالا تۇرعىندارىن جاۋاپقا تارتامىز
ەلوردا اكىمى الەۋمەتتىك جەلىلەردە كوتەرىلىپ جاتقان ماسەلەلەردى ۇدايى سارالاپ، جەلى قولدانۋشىلاردىڭ شاعىمدارىنا جاۋاپ بەرىپ، ولاردىڭ ءبىرجاقتى ويلارىنا پىكىر قوسىپ وتىرادى.
جەلى قولدانۋشىلاردىڭ ءبىرى - Daul Uahap ارنايى توپتا ءوزىنىڭ رەنىشىن بىلدىرگەن. «جۇرگىزۋشىلەر باعدارشامعا كەلگەندە ەسىكتى اشادى، دا تۇكىرەدى. بۇعان ءتوزۋ مۇمكىن ەمەس»، - دەپ جازدى ول.
وعان جاۋاپ رەتىندە ەلوردا اكىمى: «كەلىسەمىن، ەكسپو كورمەسى باستالعانعا دەيىن 3000 كامەرا ورناتامىز، جىل سوڭىنا دەيىن تاعى 7 مىڭى ورناتىلادى. ءاربىر ادەپسىزدىكتى نازارعا الىپ، ەل ۇيرەنگەنشە جاۋاپقا تارتامىز. بۇل شىلىم شەگىپ، الىپ تۇقىلىن تاستاپ كەتۋشىلەرگە دە قاتىستى»، - دەپ جازدى.
كەشىرەك اكىم تاعى: «كوشەدە تەمەكى تۇقىلىن جانە قوقىس تاستاپ، تۇكىرەتىندەرگە «سوعىس» جاريالاۋ كەرەك. ءبىز ۋاتساپ پەن وزگە دە جەلىلەردە ارنايى توپتار اشامىز. ول جەرگە ەلدىڭ بارلىعى وزدەرى تۇسىرگەن سۋرەتتەر مەن بەينەكورىنىستەردى سالىپ وتىرادى. الايدا، بۇل كەمشىلىكپەن تەك اكىمشىلىك تاسىلدەرمەن عانا كۇرەسكەن دۇرىس ەمەس، بىزگە كوپ بولىپ قولعا الىپ، قالانى تازا ەتكەن ءتيىمدى»، - دەپ قوستى ول.
