باسپاناسى تاسقىن سۋدا قيراعان اقتوبەلىكتەر پاتەرلى بولدى - فوتو
سونىمەن قاتار تاعى 8 وتباسى بەرىلگەن جەر تەلىمىنە ءۇي سالىپ العانشا ۋاقىتشا باسپانادا تۇرا الادى، دەپ حابارلايدى قازاقپارات ءتىلشىسى. سۋ تاسقىنى كەزىندە اقتوبە قالاسىنداعى 771 ءۇي زارداپ شەكتى.
بارلىعى 3 مىڭعا جۋىق ادام ءبىر اپتادا ءۇيسىز قالىپ، ۋاقىتشا مەكتەپتەردى پانالادى. كەيىن ءبارى پاتەرلەرگە شىعارىلدى. قازىر بارلىق ادام پاتەر جالداپ، تۋعان- تۋىستارىنىڭ ءۇيىن پانالاپ ءجۇر. ال بۇگىن بەس وتباسى «نۇر- اقتوبە» ىقشام اۋدانىنان پاتەر الدى.
«ماحامبەتوۆكا اۋىلىنداعى ءۇيىم ورتاسىنا ءتۇستى. جاڭا پاتەر «نۇر- اقتوبە» اۋدانىندا. ءۇش جىل تۇرامىن، كەيىن نەسيەگە ساتىپ الامىن. كۇيەۋىم جەكە كومپانيادا جۇمىس ىستەيدى. ءوزىم جۇمىسسىزبىن. ەكى بالام ستۋدەنت، بىرەۋى وقۋشى. تاعى بىرەۋى ءوز وتباسىن قۇرىپ كەتتى. قۇجاتتارىم تۇگەل. پاتەر الۋ ءۇشىن «تۇرعىن ءۇي قۇرىلىس جيناق بانكىنەن» ەسەپشوت اشىپ، سول جەرگە 300 مىڭ ساۋىمىز كەرەك دەدى. ۇيگە اس ءۇي جيھازى مەن ديۆاندى الىپ بەردى»، - دەيدى نۇرگۇل باقىتوۆا.
پاتەر يەلەرىنە كىلتتى وبلىس اكىمى بەردىبەك ساپاربايەۆ تابىس ەتتى. ول سۋ تاسقىنى كەزىندە باسپاناسى قۇلاپ قالعان ادامداردىڭ بارلىعىنا كومەك كورسەتىلەتىنىن جەتكىزدى. «بىردەن ءۇي سالۋ مۇمكىن ەمەس. ءبىز دايىن تۇرعان ۇيدەن بەرىپ جاتىرمىز. كەي ادامدارعا جەر بەرىپ، قۇرىلىس ماتەريالدارىمەن كومەكتەسەمىز. العاشقى بەس پاتەر باسپاناسى قيراپ قالعان، الەۋمەتتىك جاعدايى تومەن وتباسىعا بەرىلدى. «قولقانات اقتوبە» قورى قۇرىلىپ، تەك اقتوبەدەن ەمەس، وزگە وڭىرلەردەن قارجى اۋداردى. پاتەر العاندارعا ەسەپشوت اشىپ، 300-500 مىڭ تەڭگەدەن اقشا سالامىز.
سونىمەن قاتار، 8 وتباسىعا ۋاقىتشا پاتەر بەرىلدى. ولار جەر تەلىمىنە ءۇي سالىپ العانشا سول پاتەردە تۇرادى. جەر بەرۋ وڭاي، وعان سۋ، جارىق، گازىن جەتكىزىپ بەرۋ قيىن. جەرلەردى قاراپ جاتىرمىز. كۇن جىلىدى، ءۇي سالۋعا مۇمكىندىك بار»، - دەدى وبلىس اكىمى بەردىبەك ساپاربايەۆ.
ايتا كەتەيىك، سۋ تاسقىنى كەزىندە زارداپ شەككەندەرگە الەۋمەتتىك قولداۋ كورسەتۋ ءۇشىن وڭىردە «قولعانات اقتوبە» قورى قۇرىلدى. قورعا 102 ميلليون تەڭگەگە جۋىق قارجى ءتۇستى. قارجىنىڭ 10 ميلليون تەڭگەسىن ەكىنشى دەڭگەيلى بانك، 52 ميلليون تەڭگەسىن ماڭعىستاۋلىق مۇنايشىلار ءبولدى.
اۆتور: التىناي ساعىندىقوۆا
