شىمكەنتتەگى «داڭق» مەموريالى - ت م د ەلدەرى اۋماعىنداعى ەڭ ءىرى ەسكەرتكىشتەردىڭ ءبىرى - فوتو
اۋماعى 20 مىڭ شارشى مەتردى قامتىعان تاريحي كەشەندە وڭتۇستىك وڭىردەن سۇراپىل سوعىسقا اتتانعان بارلىق جاۋىنگەرلەردىڭ ەسىمدەرى تاسقا قاشالىپ جازىلعان، دەپ حابارلايدى قازاقپارات ح ا ا ءتىلشىسى. جەڭىستىڭ 65 جىلدىعىندا سالىنعان كەشەننىڭ ورتاسىنا «جۇلدىز» ەسكەرتكىشى ورناتىلىپ، اينالاسىنداعى گرانيت قابىرعاعا وبلىستان شىققان كەڭەس وداعىنىڭ 51 باتىرى مەن داڭق وردەنىنىڭ 8 يەگەرىنىڭ ەسىمى جازىلعان. 140000 نان استام ەسىم جازىلعان جان- جاعىنداعى تاقتايشالاردىڭ كولەمى 200 مەتر بولاتىن داڭق اللەياسى كومپوزيتسيانى جالعاستىرادى.
جاۋىنگەرلەردىڭ تىزىمىنەن قان مايداندا حابارسىز كەتكەن جاۋىنگەرلەردىڭ دە اتى ءجونىن تابۋعا بولادى. سەبەبى، ەكىنشى دۇنيەجۇزىلىك سوعىسقا وڭتۇستىك قازاقستان وبلىسىنان 140 مىڭداي ادام اتتانعان بولسا، سونىڭ جارتىسىنا جۋىعى قان مايداننان ورالعان جوق. سوعىسقا قاتىسقانداردىڭ ءتىزىمىن تولىقتىرۋعا قاجەتتى مالىمەت تىرنەكتەپ جينالعان. وبلىستىڭ اسكەري كوميسسارياتى رەسەيدەگى مۇراعاتتارمەن بايلانىسىپ، وڭتۇستىك قازاقستاندىق ارداگەرلەرگە قاتىستى بارلىق مالىمەتتى الۋعا تىرىسقان.
كومپوزيتسيانى كادىمگى جاۋىنگەرلىك ۇشاق جالعاستىرىپ تۇر. بارلىق سوعىسقان وڭتۇستىكقازاقستاندىق جاۋىنگەرلەردىڭ ەسىمىن قارا گرانيتكە ءتۇسىرۋ سول كەزدەگى وبلىس اكىمى اسقار مىرزاحمەتوۆتىڭ ۇسىنىسى بولاتىن. ول ۇسىنىستى وبلىستىڭ بارلىق كاسىپكەرلەرى قولداپ، جالپى قۇنى 220 ميلليون تەڭگە بولعان ەسكەرتكىشتىڭ قۇرىلىسىنا اقشا بولگەن ەدى. مەموريالعا جاقىن ماڭدا اۋعانستان سوعىسىندا وپات بولعان جاۋىنگەرلەردىڭ قۇرمەتىنە ارنالعان اسكەري تەحنيكالاردىڭ اشىق اسپان استىنداعى مۇراجايى ورنالاسقان.
وسىلايشا 2010 -جىلى وبلىس ورتالىعىنان داڭق مەموريالىنىڭ اشىلۋى وڭتۇستىك قازاقستان وبلىسىنىڭ ارداگەرلەرى ءۇشىن ۇلكەن سىيلىق بولدى.
ايتا كەتەيىك، تاريحي كەشەندى جاڭعىرتىپ، ۇلكەيتۋگە قازىنادان 262 ميلليون تەڭگە جۇمسالعان بولاتىن. ەسكەرتكىش كەشەن بۇگىندە شىمكەنتتەگى كورنەكتى ورىندارىنىڭ ءبىرى عانا ەمەس، تۇرعىنداردىڭ تاعزىم ەتەتىن جەرىنە اينالىپ وتىر.
اۆتور: اينۇر اقبايەۆا
