استانادا ەل تاريحىنداعى ەڭ ءىرى پاراد باستالدى
بۇل تاۋەلسىز قازاقستان تاريحىنداعى ەڭ اۋقىمدى پاراد، دەپ حابارلايدى قازاقپارات ءتىلشىسى.
الاڭعا ەلباسى قارۋلى كۇشتەردىڭ جوعارعى باس قولباسشىسى نۇرسۇلتان نازاربايەۆ كەلدى. ق ر قورعانىس ءمينيسترى ساكەن جاسۇزاقوۆقا اسكەري پاراد قولباسشىسى، ق ر قارۋلى كۇشتەرى قۇرلىق اسكەرىنىڭ باس قولباسشىسى، گەنەرال مايور مۇرات بەكتانوۆ اسكەري پاراد تۋرالى بايانداما جاسادى.
قورعانىس ءمينيسترى ەلباسىنا - باس قولباسشىعا پاراد دايىن دەپ باياندادى. شەرۋدە 5000 نان استام اسكەري قىزمەتشىلەر سالتاناتتى مارشپەن ءجۇرىپ وتەدى، 300 گە جۋىق اسكەري تەحنيكا مەن زاماناۋي قارۋ-جاراق تۇرلەرى جۇرتشىلىق نازارىنا ۇسىنىلادى. 70 كە جۋىق اۋە تەحنيكاسى قازاقستاننىڭ اۆياتسيالىق الەۋەتى مەن جاۋىنگەرلىك ازىرلىگىن پاش ەتەدى.
ءداستۇرلى تۇردە جاياۋ اسكەر لەگىن «جاس ۇلان» رەسپۋبليكالىق مەكتەپتەرىنىڭ بارابانشىلار قۇراما روتاسى باستايدى. العاش رەت بارابانشىلار ساپىنا استانا، الماتى، قاراعاندى، شىمكەنت قالالارىنداعى رەسپۋبليكالىق «جاس ۇلان» اسكەري مەكتەپتەرىنىڭ ۇزدىك تاربيەلەنۋشىلەرى ىرىكتەلىپ الىندى.
ءارى قاراي شەرۋدى ق ر قورعانىس مينيسترلىگىنىڭ وفيتسەرلەرى، قۇرلىق اسكەرلەرى، اۋە قورعانىسى كۇشتەرى جانە اسكەري-تەڭىز كۇشتەرى، دەسانتتىق-شابۋىلداۋ اسكەرلەرى، تەڭىز جاياۋ اسكەرى، بىتىمگەرشىلىك كۇشتەردىڭ، ارنايى ماقساتتاعى بولىمشەلەردىڭ وفيتسەرلەرى، اسكەري قىزمەتشى ايەلدەر، اسكەري پوليتسيا جانە اۋماقتىق قورعانىس بريگاداسىنىڭ پارادتىق ەسەپتوپتارى جالعاستىرادى.
سونىمەن قاتار، الاڭعا 2016-2017-جىلدارى اسكەري ارسەنالىمىزدى تولىقتىرعان زاماناۋي اسكەري تەحنيكا مەن قارۋ-جاراق تۇرلەرى شىعارىلادى. قازاقستاندىقتار «قاز گراد»، «سمەرچ»، «پريما» وق اتۋدىڭ رەاكتيۆتى جۇيەلەرى، «كوبرا» جاۋىنگەرلىك بارلاۋ ماشينالارى، «شتۋرم- س» تانكىگە قارسى زىمىران كەشەنى، «گياتسينت» زەڭبىرەكتەر باتارەياسى، «تيۋلپان» وزدىگىنەن جۇرەتىن مينااتقىشى، «توچكا-ۋ» تاكتيكالىق زىمىراندارى، «ارلان» بروندى دوڭگەلەك ماشينالارى، «ناتيسك» ۇشۋ اپپاراتتارى مەن راديوەلەكتروندىق بارلاۋ جۇيەلەرى، «فەدەرال» ارنايى بروندالعان اۆتوموبيلدەر لەگى، «تيگر» ارنايى پوليتسيا اۆتوموبيلى سىندى ءبىرقاتار جاڭا تەحنيكا تۇرلەرىن تاماشالاي الادى.
اۋە قورعانىسى كۇشتەرىنىڭ ەڭ ۇزدىك ۇشۋ اپپاراتتارى استانا اسپانىندا «25» مەرەكەلىك داتاسىن جانە «بايتەرەك» اتتى جوعارى پيلوتاج فيگۋراسىن كورسەتەدى. ايتا كەتەيىك، پارادقا شىعارىلاتىن اسكەري تەحنيكالاردىڭ جارتىسىنا جۋىعى قازاقستاندا شىعارىلعان.
اتاپ ايتقاندا، «ارلان» بروندى تەحنيكاسى، «قاز گراد» رەاكتيۆتى جۇيەلەرى، «دجيگيت» زەڭبىرەك قوندىرعىلارى جانە نەگىزگى كولىك بولىپ سانالاتىن كاماز كولىكتەرى وتاندىق قورعانىس ونەركاسىپتەرىندە شىعارىلعان.
اۆتور: ايجان سەرىكجان قىزى