ەلوردا ستۋدەنتتەرى باۋىرجان مومىش ۇلى ەسكەرتكىشىنە تاعزىم ەتتى - فوتو
ەكىنشى دۇنيەجۇزىلىك سوعىستا قازا تاپقان 1 ميلليون 300 مىڭنان استام قازاقستاندىقتى ءبىر مينۋت ۇنسىزدىكپەن ەسكە العاننان كەيىن ستۋدەنتتەر باۋىرجان مومىش ۇلىنىڭ ەسكەرتكىشىنە گۇل شوقتارىن قويدى.
«ءبىز بۇگىن ۇلى جەڭىستىڭ 72 جىلدىعىنا وراي قازاق جەرىنەن شىققان ۇلى قولباسشى باۋىرجان مومىش ۇلىنىڭ ەسكەرتكىشىنە گۇل شوقتارىن قويۋ ءراسىمىن وتكىزىپ وتىرمىز. ەكىنشى دۇنيەجۇزىلىك سوعىستاعى جەڭىسكە قازاقستان حالقىنىڭ قوسقان ۇلەسى ۇشان-تەڭىز ەكەندىگىن ءبارىمىز دە بىلەمىز. تاۋەلسىزدىگىمىزدى العاننان كەيىن حالىق قاھارمانى اتاعىنا يە بولعان ب. مومىش ۇلى، ق. قايسەنوۆ، ح. دوسپانوۆا، س. نۇرماعامبەتوۆ، سۇراپىل ۇرىستارداعى ەرلىگى ءۇشىن كەڭەس وداعىنىڭ باتىرى اتانعان ءا. مولداعۇلوۆا، م. مامەتوۆا، ت. بيگەلدينوۆ، ر. قوشقاربايەۆ سىندى باتىرلارىمىزدى ەش ەستەن شىعارمايمىز. ولاردىڭ الىپ بەرگەن جەڭىسىن كەيىنگى ۇرپاق، ياعني ءبىز جوعارى باعالايمىز. اسپانىمىز اشىق بولىپ، بەيبىت ءومىر ءسۇرۋىمىز ءۇشىن قاسىق قانى قالعانشا جاۋمەن ايقاسىپ، ۇلى جەڭىستى كەيىنگى ۇرپاققا امانات ەتكەن بارلىق سوعىس ارداگەرلەرىنە شىنايى العىسىمىزدى بىلدىرەمىز»، - دەدى قازاق مەملەكەتتىك زاڭ ۋنيۆەرسيتەتىنىڭ ستۋدەنتى عالىمجان نيازوۆ.
سونىمەن قاتار قازاقستاندىق جاستاردىڭ بويىنداعى وتانسۇيگىشتىك قاسيەتتى دامىتىپ، ەلى مەن جەرىنە دەگەن سۇيىسپەنشىلىكتى وياتۋ ءۇشىن بۇگىنگىدەي شارالاردىڭ ءجيى وتكىزىلىپ تۇرۋى قاجەت ەكەندىگىن باسا ايتتى.
