مايدانگەر قۇسپان بورانبايەۆتىڭ سۇيەگى نوۆگورودتان تابىلدى
قازىر ەكىنشى دۇنيەجۇزىلىك سوعىستا قازا بولعان اتىراۋلىق جاۋىنگەردىڭ تۋعان-تۋىستارى ىزدەستىرىلىپ جاتىر، دەپ حابارلايدى قازاقپارات ءتىلشىسى.
«جىل سايىن ءساۋىر ايىنىڭ اياعى مەن مامىر ايىنىڭ باسىندا سوعىس بولعان نوۆگورود وبلىسىنا جەر-جەردەن ىزدەۋ جاساقتارى جينالىپ، قازبا جۇمىستارىن جۇرگىزەدى. باتپاقتى جەردە كەڭەس اسكەرىنىڭ جاۋىنگەرلەرىن ىزدەۋ جۇمىستارى ۇزدىكسىز ءجۇرىپ جاتىر. كەيدە ساپار تابىستى بولادى، كەيدە ەش ناتيجە بەرمەيدى. بۇل جولى ءبىز قازاقستاندىق جاۋىنگەردىڭ مەدالىن تاۋىپ الدىق. ول قۇسپان بورانبايەۆقا تيەسىلى»، - دەدى «جاۋىنگەرلىك باۋىرلاستىق» قورىنىڭ قۇرىلتايشىسى گۋمەر گالەيەۆ.
تابىلعان جاۋىنگەر سۇيەگى قۇسپان بورانبايەۆقا تيەسىلى. ول گۋريەۆ، قازىرگى اتىراۋ وبلىسىنان سوعىسقا اتتانعان. قۇجات بويىنشا دەنديزسكي اۋدانى، مورەكۋيسكي اۋىلدىق سوۆەتى، قىزىلتۋك اۋىلىنىڭ تۋماسى. ىزدەۋ جاساعىنىڭ ايتۋىنشا، جاۋىنگەر قۇسپان بورانبايەۆ سوعىسقا اتتانعان كەزدە وتباسىلى بولعان.
ايتا كەتەيىك، 1942-جىلى رەسەيدىڭ نوۆگورود وبلىسى، ولحوۆەتس پارفينسكي اۋىلىنا شابۋىل جاسالىپ، ۇرىس بولعان.
«جاۋىنگەر كۇنى بۇگىنگە دەيىن ءىز-ءتۇزسىز جوعالعانداردىڭ قاتارىندا بولعان. مايدانگەر بورانبايەۆتىڭ تۋعان-تۋىستارى تابىلىپ جاتسا، نوۆگورود وبلىسى، پارفينسكي اۋدانىنىڭ اكىمشىلىگىنە حابارلاسۋىن سۇرايمىز. قازىر قايتا جەرلەۋ ءراسىمى ءجۇرىپ جاتىر. ءبىراق ىزدەۋ جاساعى بورانبايەۆتىڭ سۇيەگىن تۋعاندارىنا بەرۋگە ءازىر»، - دەدى گۋمەر گالەيەۆ.
