استاناعا ەسىرتكى جەتكىزەتىن ءىرى ارنانىڭ جولى كەسىلدى

استانا. قازاقپارات - ق ر ءى ءى م ەسىرتكى بيزنەسىمەن كۇرەس دەپارتامەنتىنىڭ قىزمەتكەرلەرى جامبىل وبلىسىنان استاناعا ەسىرتكى زاتتارىن جەتكىزىپ كەلگەن ءىرى ارنانىڭ كوزىن جويدى.

بۇل جايىندا ق ر ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ ءوزىنىڭ فەيسبۋكتەگى پاراقشاسىندا جازدى، دەپ حابارلايدى قازاقپارات.

ونىڭ مالىمەتىنشە، استانا مەن شۋ قالالارىندا ءبىر مەزەتتە جۇرگىزىلگەن ارنايى وپەراتسيا بارىسىندا ۇيىمداسقان قىلمىستىق توپتىڭ 8 مۇشەسى ۇستالدى. توپتىڭ جەتەكشىسى - جامبىل وبىسىنىڭ تۋماسى.

«ۇيىمداسقان قىلمىستىق توپ جەتەكشىسىنىڭ جالداپ تۇرىپ جاتقان پاتەرىن ءتىنتۋ بارىسىندا سالماعى 27 كەلىدەن اساتىن «گاشيش» ەسىرتكى زاتى الىندى. قىلمىستىق توپتىڭ تاعى ءبىر مۇشەسىنىڭ تۇرعىلىقتى جەرىن ءتىنتۋ بارىسىندا 2 تسەنتنەردەن استام «ماريحۋانا» مەن 11 كەلى «گاشيش»، سونىمەن قاتار ەسىرتكى دايىنداۋعا ارنالعان سىعىمداۋ سەحى تابىلدى. كۇدىكتىلەر ۋاقىتشا وقشاۋلاعىشقا قامالىپ، قىلمىستىق ءىس قوزعالدى»، - دەدى الماس سادۋبايەۆ.