اتىراۋداعى ەڭ سۇلۋ فوتومودەل مال شارۋاشىلىعىنان قالاي تابىسقا جەتتى - فوتو

استانا. قازاقپارات - اتىراۋلىق فوتومودەلدىڭ اۋىلشارۋاشىلىعىن قولعا الۋى جۇرتشىلىقتىڭ نازارىن اۋدارىپ وتىر.

نازەركە كۋسەسوۆا بۇل سالادا قىزمەت ەتەمىن دەپ مۇلدە ويلاماعان. NUR. KZ ءتىلشىسى اتىراۋ سۇلۋىنان ءۇش قايناسا سورپاسى قوسىلمايتىن بيزنەسى مەن حوببيىن ادەمى ۇشتاستىرۋىنىڭ سىرىن سۇرادى.

نازەركە كۋسەسوۆا فوتومودەلدىك كاسىپكە وسىدان ەكى جىل بۇرىن قادام باسقان.

«العاش رەت مودەلدىك اگەنتتىككە ەكى جىل بۇرىن باس سۇقتىم. بىزگە ول جەردە پوديۋمدا ءجۇرىپ-تۇرۋدى، ءوز-ءوزىمىزدى كامەرانىڭ الدىندا ۇستاي ءبىلۋدى ۇيرەتتى. سول جەردە العاشقى فوتوسەسسيام بولدى. سودان باستاپ مەن فوتوگرافتاردىڭ نازارىنا ىلىگە باستادىم. ودان سوڭ دۋبايعا دەمالۋعا بارعاندا فوتوگرافتار بايقاپ قالىپ، ماعان فوتوسەسسيا جاساۋعا ۇسىنىس جاسادى. كەيىن تۇركياعا بارعاندا فوتوسەسسياعا ۇسىنىس جاسادى. وسىلايشا قازىر ەلىمىزدە ينستاگرام جەلىسىندە ءتۇرلى تاۋارلاردى جارنامالاپ ءجۇرمىن. بۇعان مەن حوببي رەتىندە قارايمىن. ودان ءلاززات الامىن»، - دەيدى نازەركە.

اتىراۋلىق ارۋ مالايزيادا ءتىلىن جەتىلدىرىپ، ەلىمىزدە مۇناي سالاسىندا ءبىلىم العان. الايدا ول ءوز بولاشاعىن جەكە كاسىپكەرلىكتەن تاپتى.

«اكەم كاسىپكەر بولعاندىقتان سول كىسىگە كومەكتەسەيىن، اتا-انامنىڭ ماعان ىستەگەن بار جاقسىلىعىن قايتارايىن دەگەن نيەتپەن اۋىلشارۋاشىلىق سالاسىنا بەت بۇردىم»، - دەيدى ول بۇل قادامىنىڭ سەبەبىن تۇسىندىرە كەلە.

باتىس قازاقستان وبلىسىندا تۋىپ-ءوسىپ، قازىر اتىراۋدا تۇرىپ جاتقان نازەركە كۋسەسوۆا وتباسىلىق كاسىبىنىڭ اياق الىسىمەن ءبولىستى.

«اكەم مەن انام بۇل كاسىپتى ءبىزدىڭ كىشكەنتاي كەزىمىزدە باستادى. ۇيدە ءۇش قىزبىز. مەن ورتانشىسىمىن. مال شارۋاشىلىعىمىز باتىس قازاقستان وبلىسىندا. ەتتى سول جاقتان تاسيمىز. ونى قوناق ۇيلەرگە، مەيرامحانا، ءتۇرلى فيرمالارعا وتكىزەمىز. جاقىندا تاعى ءبىر مال شارۋاشىلىعى قوجالىعىن اشتىق. بولاشاققا جوسپارىمىز كوپ. تاۋار كولەمىن ارتتىرىپ، تۇتىنۋشىلار بازاسىن كوبەيتسەك دەيمىز. كەلەسى جىلى رەسەي نارىعىنا شىقساق دەگەن وي دا بار. قاراشا ايىندا وتەتىن جاس وتاننىڭ جاستار فورۋمىنا ايماقتاعى بيزنەس وكىلىنىڭ ءبىرى رەتىندە شاقىرتۋ الدىم. بۇل مەن ءۇشىن جەڭىستىك دەپ ويلايمىن»، - دەپ قۋانىشىمەن ءبولىستى اتىراۋلىق كاسىپكەر.

نازەركە بيزنەس جولىندا قيىندىقتاردىڭ بولماي قويمايتىنىن تىلگە تيەك ەتتى. ول ەشقاشان وزىنە دەگەن سەنىمدى جوعالتپاۋ ماڭىزدى دەپ ەسەپتەيدى.

«مەن بارعان بىرنەشە بيزنەس، پسيحولوگيالىق ترەنينگتەردەن تۇسىنگەنىم - بۇل ومىردە ءوز-وزىڭە سەنۋ كەرەك ەكەن. ەشقاشان دا وزىڭە دەگەن سەنىمدى جوعالتپاۋ قاجەت. ەشتەڭە وڭايلىقپەن كەلمەيدى. قيىندىقسىز بولمايدى. ولاردى جەڭە ءبىلۋ كەرەك. وعان ءارقاشان دا دايىن بولۋ كەرەك. بيزنەس بولعان سوڭ، ءبارىن كورۋگە تۋرا كەلەدى. ءبىزدى الداپ كەتىپ، ۇلكەن سوماداعى اقشانى بەرمەي، كەيىن بانكروت بولعاندار دا كەزدەستى. ءبىراق ەشقاشان ەڭسەنى تۇسىرمەۋ كەرەك. بيزنەس بولعاسىن بارلىعى بولادى. ادام ەشتەڭەدەن ساقتاندىرىلماعان»، - دەيدى ول.

نازەركە ونداي كەزدەردە باستىسى، ادامدارمەن ءتىل تابىسا ءبىلۋ ەكەنىن العا تارتادى.

ول وسى كۇنگە جەتكىزگەن اكەسىن ماقتان تۇتادى.

«سەبەبى ول كىسى كۇنى-ءتۇنى ۇيىقتاماي، جولدا ءجۇرىپ، وسى كۇنگە جەتكىزدى. كىشكەنتاي كەزىمىزدە ورالدا تۇرعاندا اكەمنىڭ ەسكى كولىگى بولدى. ونىڭ پەشى دە بولماپتى. سونىمەن ورالدان سۋىققا قاراماي ەت تاسيتىن. ءسويتىپ وسى دارەجەگە ءوزىنىڭ ەڭبەكقورلىعىنىڭ جانە انامنىڭ قولداۋىنىڭ ارقاسىندا جەتىپ وتىر»، - دەيدى نازەركە كۋسەسوۆا.