الاكولگە اپاراتىن جاڭا جول سالىنادى

استانا. قازاقپارات - الماتى وبلىسى اۋماعىنداعى الاكولگە جاڭا جول قۇرىلىسى وسى جىلى باستالادى.

بۇل تۋرالى بۇگىن ق ر ۇكىمەتىندەگى باسپا ءسوز ءماسليحاتىندا ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك ءمالىم ەتتى، دەپ حابارلايدى قازاقپارات.

«اعىمداعى جىلى ءۇشارال-دوستىق جولىنىڭ قۇرىلىسىن باستايمىز. بۇل الاكولگە قاراي باراتىن جول. جالپى، جىل سايىن 500 مىڭ ادام، ونىڭ ىشىندە الماتى وبلىسىنىڭ تۇرعىندارى دا الاكولگە بارادى. جاڭا جول سالىپ، ءۇشارال اۋەجايىنىڭ جاعدايىن جاقسارتۋ ارقىلى اتالعان شيپاجايدىڭ تۋريستىك الەۋەتىن جاقسارتا تۇسە الامىز دەپ جوسپارلاۋدامىز. ءدال وسىنداي جوسپارلارىمىز تۇركىستان، بۋراباي، شىعىس قازاقستان وبلىسىنىڭ شيپاجاي ايماقتارى باعىتىندا دا بار»، - دەدى مينيستر.

ايتا كەتەيىك، الاكول - تۇزدى، اعىنسىز كول. ول الماتى جانە شىعىس قازاقستان وبلىستارىنىڭ شەكاراسىندا ورنالاسقان. كولدىڭ وڭتۇستىك-شىعىس جاعىندا جوڭعار قاقپاسى بار. باتىس جاعىندا كوكتۋما اۋىلى قونىس تەپكەن.

ول قازاق-قىتاي شەكاراسىنان 80 شاقىرىم جەردە جاتىر. شىعىسىندا قابانباي اۋىلى. بۇل اۋىل دامىعان تۋريستىك ينفراقۇرىلىمىمەن ەرەكشە، قابانبايدىڭ شىعىسىندا 15 شاقىرىم جەردە بارلىق- اراسان شيپاجايى بار. الاكولدە شيپاجاي دەمالىس ورىندارىنىڭ ورنالاسۋىنىڭ سەبەبى - سۋى مينەرالدارعا باي. سۋ قۇرامىندا مەندەلەيەۆ كەستەسى ەلەمەنتتەرىنىڭ كوبى كەزدەسەدى، قۇرامى جاعىنان قارا جانە ءولى تەڭىزدەرگە ۇقسايدى.