ەلوردادا اسكەري ارتىستەر اۆتوبۋس جولاۋشىلارىنا ءان شىرقاپ بەردى

استانا. قازاقپارات - ق ر قارۋلى كۇشتەرىنىڭ ۇلتتىق اسكەري-پاتريوتتىق ورتالىعىنىڭ ارتىستەرى استانا قالاسىنداعى قوعامدىق كولىك جولۋشىلارىنا ارناپ سوعىس جىلدارىنداعى اندەردى ورىندادى دەپ حابارلايدى «قازاقپارات» ءتىلشىسى.

«كەشە 10№ اۆتوبۋستا ەرەكشە كونسەرتتىڭ كۋاگەرى بولدىم. جوبانى ۇلى جەڭىس كۇنىنە وراي قورعانىس مينيسترلىگى ازىرلەگەن. اسكەري ءانسامبلدىڭ انشىلەرى ءان شىرقاپ قانا قويماي، كەيبىر جەرلەردە ءبي بيلەپ، تۇرعىنداردىڭ كوڭىل-كۇيىن كوتەرۋگە تىرىستى. وسىنداي اسەرلى ءارى توسىن شارا ۇيىمداستىرعاندارىڭىز ءۇشىن راحمەت»، - دەپ جازدى استانا قالاسىنىڭ تۇرعىنى ءوزىنىڭ فەيسبۋكتەگى پاراقشاسىندا.

ق ر قورعانىس مينيسترلىگى اكسيانىڭ 7- مامىر مەرەكەسى قارساڭىندا ق ر قارۋلى كۇشتەرىنىڭ قۇرىلعانىنا 25 جىل تولۋىنا جانە 9- مامىر جەڭىس مەرەكەسىنە وراي وتكىزىلگەندىگىن ايتتى.

فلەشموبتى وتكىزۋ ءۇشىن جۇمىس ۋاقىتىنىڭ سوڭى ارنايى تاڭدالىپ الىنعان. «الماتىدا دا ءدال وسىنداي اكسيانى ۇيىمداستىرۋ جوسپارلانۋدا. ءبىراق اۆتوبۋستا ەمەس، مەترودا. وعان «كيروۆ» اسكەري-پاتريوتتىق كلۋبىنىڭ بالالارى تارتىلاتىن بولادى»، - دەپ حابارلادى ق ر قورعانىس مينيسترلىگىنىڭ باسپا ءسوز قىزمەتى.

قورعانىس مينيسترلىگىنىڭ مەرەكەلىك اكسيالارى مۇنىمەن اياقتالمايدى. 7- مامىردا استانا قالاسىنىڭ قوناقتارى مەن تۇرعىندارى ءۇشىن اسكەري شەرۋدەن باسقا «حان شاتىر» ساۋدا ويىن-ساۋىق ورتالىعىندا قۇرمەت قاراۋىل روتاسى قويان-قولتىق ۇرىس تاسىلدەرىن، سونداي-اق قارۋدى قولدانىپ جانە قارۋسىز ۇرىس قيمىلدارىن كورسەتەتىن بولادى.