جامانقۇلوۆتىڭ دەنساۋلىعى ناشارلاۋىنا بايلانىستى سوت وتىرىسى وتپەي قالدى

الماتى. قازاقپارات - الماتى قالاسى قىلمىستىق ىستەر جونىندەگى مامانداندىرىلعان اۋدانارالىق سوتىندا «فەنيكس» فيلمى بويىنشا ءوتۋى قاجەت بولعان سوت پروتسەسى تۇڭعىشباي جامانقۇلوۆتىڭ سىرقاتتانىپ قالۋىنا بايلانىستى كەيىنگە شەگەرىلدى.

ءىستى جۇرگىزۋشى سۋديا تاكەن شاكيروۆ ەگەر جامانقۇلوۆ كەلەسى سوتقا قاتىسپايتىن بولسا، ونى قاماۋدا ۇستاۋ شاراسىنا وزگەرتەتىنىن ايتىپ، ەسكەرتۋ جاسادى، دەپ حابارلايدى قازاقپارات ءتىلشىسى.

سوتتا تۇڭعىشباي جامانقۇلوۆتىڭ اۆدوكاتى قورعاۋىنداعى ازاماتتىڭ 4- مامىردان باستاپ، ەمحانادا ستانتسيونارلىق ەمدەلۋدە جاتقانىن راستايتىن انىقتامانى سۋديا تاكەن شاكيروۆكە تابىس ەتتى.

انىقتامادا تۇڭعىشباي جامانقۇلوۆقا ارتەريالدى گيپەرتونيا، جۇرەك اۋرۋىنا قاتىستى دياگنوز قويىلعانى كورسەتىلگەن.

ونىڭ ادۆوكاتى تۇڭعىشباي جامانقۇلوۆتىڭ تۇندە جاعدايى كۇرت ناشارلاپ، اۋرۋحاناعا الىپ كەتكەنىن ايتقانىمەن، سۋديا شاكيروۆ بۇعان نارازىلىق تانىتتى.

«ءبىز جامانقۇلوۆسىز سوتتى باستاي المايمىز. وتكەن سوت پروتسەسىندە جامانقۇلوۆ ءوتىنىمحات بەرىپ، ەكونوميكالىق ساراپشىلار شاقىرتۋدى سۇراعان، ءبىز ونىڭ سۇراۋى بويىنشا 3 ساراپشىنى شاقىرتتىق، كەلە جاتىر. «31- ارنا» ماماندارىن فيلم («فەنيكس» - رەد.) تيزەرى بويىنشا الدىرتىپ جاتىرمىز. بارلىعىنىڭ دا دەنساۋلىعى ناشار، بارلىعىنىڭ دا جۇمىسى بار. اسىرەسە، قاماۋدا وتىرعانداردىڭ (جانىبەكوۆ، ىسقاقوۆا، - رەد) دەنساۋلىعىن تەكسەرسە اقاۋ شىعادى. ەگەر ول كەلەسى جولى سوتقا كەلمەيتىن بولسا، ونى قاماۋدا ۇستاۋ شاراسىن وزگەرتەتىن بولامىن. وسىنى جەتكىزىڭىزدەر. ول سوتقا قاتىسا الادى. مەن ونى قاماۋدا ۇستاۋ شاراسىنا وزگەرتەتىن بولسام، ول «سول جەردە» وتىراتىن بولادى دا ءبىز بۇل ءىستى اياعىنا جەتكىزەتىن بولامىز. ادامدار جۇمىسىنان سۇرانىپ كەلىپ وتىر»، - دەدى تاكەن شاكيروۆ.

وسىدان كەيىن جامانقۇلوۆتىڭ ادۆوكاتى سوت وتىرىسىن باسقا كۇنگە اۋىستىرۋدى سۇرادى. سۋديا شاكيروۆ تۇڭعىشباي جامانقۇلوۆتىڭ ناقتى قايدا ەم الىپ جاتقانىن سۇرادى. اۆدوكات بۇرىنعى «سوۆمين»، قازىرگى ق ر پرەزيدەنتى ءىس باسقارماسى مەديتسينالىق ورتالىعى ورتالىق كلينيكالىق اۋرۋحاناسىندا ەكەنىن ايتتى.

الايدا، سۋديا بۇل اقپاراتتى دا انىقتاۋدى تاپسىردى. كەلەسى سوت وتىرىسى 12- مامىرعا بەلگىلەندى.

ەسكە سالا كەتەيىك، 28- ءساۋىر كۇنى «فەنيكس» كينوكارتيناسىنا بولىنگەن قاراجاتتى قولدى ەتىپ، ماقساتسىز جۇمسادى دەپ ايىپتالىپ وتىرعان فيلم رەجيسسەرى تالعات جانىبەكوۆتى قاماۋدا ۇستاۋ مەرزىمى ءبىر ايعا، 2017-جىلدىڭ 28- مامىرىنا دەيىن ۇزارتىلعان بولاتىن.

27- ءساۋىر كۇنى وتكەن سوت وتىرىسىندا تۇڭعىشباي جامانقۇلوۆ سۋدياعا ءوتىنىمحات بەرىپ، ءىس بويىنشا ەكونوميكالىق ساراپتاما تاعايىنداۋدى سۇراعان. بۇل ارەكەتىن تۇڭعىشباي جامانقۇلوۆ «قازاقپارات» تىلشىسىنە بىلاي دەپ تۇسىندىرگەن بولاتىن. «قارجى پوليتسياسى ءوز ساراپتاماسىن جاساعان. ءبىز جۇمىس جاسالعانىن دالەلدەۋ ءۇشىن ەكونوميكالىق ساراپتاما كوميسسياسىن قۇرۋدى سۇرايمىز. ول ساراپتاما توبى ق ر ادىلەت مينيسترلىگى تاراپىنان، ونەر سالاسىن بىلەتىن، فيلمدى تۇسىنەتىن مامانداردى قۇرامىنا ەنگىزە وتىرىپ قۇرىلسا دەيمىز. كينو ءتۇسىرۋ ءتاسىلىن بىلەتىن ادامدار بولعانى وتە ماڭىزدى»، - دەگەن ەدى تۇڭعىشباي جامانقۇلوۆ.

اۆتور: الماس مۇقاش ۇلى