تۇرىكتىڭ تانىمال رەجيسسەرى قوجا احمەت ياساۋي جايىندا فيلم تۇسىرگىسى كەلەدى
رەجيسسەر بۇل تۋرالى شاكەن ايمانوۆ اتىنداعى «قازاق فيلم» كينوستۋدياسىندا وتكەن كەزدەسۋدە ءمالىم ەتكەن.
ايتا كەتەيىك، تۇرىكتىڭ تانىمال رەجيسسەرى كامىل كوچ پەن «قوجا احمەت ياساۋي ءبىلىم جانە پاراسات» قوعامدىق قورىنىڭ پرەزيدەنتى احمەت ياحشي قازاقستانعا «قازاق فيلم» كينوستۋدياسىمەن جانە جالپى قازاق كينەماتوگرافياسىمەن تانىسۋ ماقساتىندا كەلگەن، دەپ حابارلايدى قازاقپارات «قازاق فيلم» كينوستۋدياسىنىڭ باسپا ءسوز قىزمەتىنە سىلتەمە جاساپ.
«قازاق فيلم» كينوستۋدياسىنىڭ پرەزيدەنتى باقىت قايىربەكوۆپەن كەزدەسۋ بارىسىندا كەزدەسۋدە كامىل كوچ ارنايى قابىلداعانى جانە ەلىمىزدىڭ ەڭ ۇلكەن كينوفابريكاسىمەن تانىسۋعا مۇمكىندىك جاساعانى ءۇشىن كومپانيا باسشىلىعىنا العىسىن ءبىلدىردى. سونداي-اق كەزدەسۋ بارىسىندا كامىل كوچ تۇركى حالىقتارى فيلمدەرىن ءوندىرۋ جانە قارجىلاندىرۋعا باعىتتالعان كينو قورىن قۇرۋ تۋرالى ۇسىنىس تاستادى.
ول سونىمەن قاتار، قوجا احمەت ياساۋي جايىندا فيلم تۇسىرۋگە قىزىعۋشىلىق تانىتاتىنىن جانە بۇل جوبانى «قازاق فيلممەن» بىرلەسىپ ىسكە اسىرۋدى قالايتىنىن ايتتى. ءوز كەزەگىندە باقىت قايىربەكوۆ بولاشاقتا اشىلاتىن تۇركى تىلدەس حالىقتارىنىڭ فيلمدەرى قورى قۇرىلۋىنا تىلەكتەس ەكەندىگىن جەتكىزدى.
«كينوستۋديامىزعا كەلگەندەرىڭىزگە قۋانىشتىمىز جانە تۇرىك كينەماتوگرافيستەرىمەن بىرلەسىپ جۇمىس جاساۋعا ءاردايىم دايىنبىز. كينوستۋديانىڭ باعىتتارىنىڭ ءبىرى شەتەلدىك ستۋديالارمەن بىرلەسكەن جوبالاردى ىسكە اسىرۋ. ونىڭ ۇستىنە جاسالاتىن فيلمدەر ورتاق تاريحىمىزدان حابار بەرەدى. كينوستۋديانىڭ مەنشىگىندە سماعۇل ەلۋباي جازعان «ياساۋي» اتتى دايىن سەناري بار جانە بىرلەسىپ جۇمىس جاسايتىن جاعدايدا سىزدەردى اۆتورمەن تانىستىرامىز»، - دەدى باقىت قايىربەكوۆ.
سونداي-اق، ول اڭگىمە بارىسىندا قازاق فيلمدەرى تۇركيانىڭ كينوفەستيۆالدەرىنە، اتاپ ايتقاندا، كامىل كوچتىڭ ءوزى باسقاراتىن «بوسفور» فەستيۆالىنە جىل سايىن قاتىسىپ جۇلدەمەن ورالاتىنىن اتاپ ءوتتى.
