تۇركيا سيريا ازاماتتارىن قورعاۋ باعىتىنداعى شارالاردى جالعاستىرا بەرەدى

استانا. قازاقپارات - تۇركيا سىرتقى ىستەر مينيسترلىگى استانا پروتسەسىنىڭ كەزەكتى راۋندى بويىنشا مالىمدەمە جاسادى.

«ءبىز جانجالداسۋشى تاراپتار اراسىندا اۋە كەڭىستىگى ارقىلى قولدانىلاتىن قۇرىلعىلاردى قوسا العاندا بارلىق قارۋلاردى قولدانۋدى توقتاتۋ مەن وڭىرگە گۋمانيتارلىق كومەكتەردىڭ ءۇزىلىسسىز جەتكىزىلۋىن قامتاماسىز ەتۋگە قاتىستى ماسەلەلەر كوتەرىلگەن اتالمىش مەموراندۋىمدى قولدايمىز. تۇركيا قاۋىپسىزدىك پەن گۋمانيتارلىق قاجەتتىلىكتەر تۇرعىسىنان العاندا سيريالىق ازاماتتاردى ءتيىمدى قورعاۋعا باعىتتالعان شارالاردى جۇزەگە اسىرۋعا كۇش سالا بەرەتىن بولادى. ءبىر مەزگىلدە تۇركيا ساياسي رەتتەۋ پروتسەسىندە اقىلعا قونىمدى قادامدار جاساي وتىرىپ، قازىرگى تاڭداعى اتىستى توقتاتۋ تۋرالى رەجيمدى قولدايدى»، - دەلىنگەن تۇركيانىڭ س ءى م مالىمدەمەسىندە.

ايتا كەتەيىك، 3-4- مامىر كۇندەرى سيرياداعى شيەلەنىستى رەتتەۋ بويىنشا استانا پروتسەسىنىڭ ءتورتىنشى راۋندى ءوتتى.

وندا 2016-جىلدىڭ 30- جەلتوقسانىندا جاريالانعان اتىستى توقتاتۋ تۋرالى رەجيمدى قولداۋعا ارنالعان ساياسي شەشىمدى ىزدەستىرۋ جولدارى قاراستىرىلىپ، وسىعان قاراي جانجالداسۋشى تاراپتار پايدالانۋى ىقتيمال سەنىم شارالارى دايىندالدى.

كەزدەسۋ بارىسىندا اتىستى توقتاتۋ باعىتىندا كەپىلگەر مەملەكەتتەر بولىپ تابىلاتىن - تۇركيا، رەسەي مەن يران تاراپىنان سيريادا، ناقتىراق ايتقاندا، لاتاكيا پروۆينتسياسىنىڭ جەكەلەگەن ايماقتارىندا، الەپپونىڭ ءبىرقاتار وڭىرلەرىندە، حاما پروۆينتسياسىندا، حومس، داماسك/شىعىس گۋتا پروۆينتسيالارىنىڭ جەكەلەگەن بولىكتەرىندە جانە دەرا مەن كۋنەيترانىڭ ءبىرقاتار اۋماقتارىن قامتيتىن وڭىرلەردە قاۋىپسىزدىك ايماعىن قالىپتاستىرۋ تۋرالى مەموراندۋمعا قول قويىلدى.

اۋدارما: ايدار وسپاناليەۆ