20:40, 04 - مامىر 2017 | GMT +5
م م ا چەمپيوندارى گولليۆۋد جۇلدىزىنا ۇقسايتىن قازاقستاندىق بوكسشى قىزعا ساتتىلىك تىلەدى
استانا. قازاقپارات - بۇگىن ەلوردادا باستالعان قىزدار اراسىنداعى بوكستان ەل چەمپيوناتىندا 64 كەلى سالماق دارەجەسىندە قازاقستاننىڭ تالانتتى بوكسشىلارىنىڭ ءبىرى زارينا سولويەۆا شارشى الاڭعا شىعادى،
دەپ حابارلايدى قازاقپارات.
ММА- دان (ارالاس جەكپە جەك) قازاقستان چەمپيونى ۆارۆارا پولتورانينا، م م ا- دان قازاقستان چەمپيونى ەرناز مۇسابەك جانە م م ا- دان قازاقستاننىڭ ەكى دۇركىن چەمپيونى، ازيا چەمپيونى يسمايل گەرويەۆ ينستاگرامداعى وزدەرىنىڭ پاراقشالارى ارقىلى زاريناعا ەل بىرىنشىلىگىندە ساتتىلىك تىلەپ، ۆيدەو ۇندەۋ جولدادى. م م ا بويىنشا تانىمال كاسىبي سپورتشى سەرگەي موروزوۆ تا زارينانىڭ جەڭىسكە جەتۋىنە تىلەكشى ەكەندىگىن ءبىلدىردى.
ەستەرىڭىزگە سالا كەتسەك، زارينا سولويەۆا 2014 -جىلى بوكستان قازاقستان چەمپيونى اتانسا، 2016 -جىلى قولا مەدال يەلەنگەن ەدى. ول سپورت جانكۇيەرلەرى اراسىندا ءوزىنىڭ بەت- الپەتىنىڭ گولليۆۋدتىق جۇلدىز اندجەلينا دجوليگە ۇقساستىعىمەن ەستە قالعان بولاتىن.
اۆتور: مارلان جيەمباي
