گيننەسس كىتابىنا جەتى رەت ەنگەن جەلاياق اتىراۋداعى مارافونعا قاتىسادى
تۇڭعىش رەت ۇيىمداستىرىلعالى وتىرعان بۇقارالىق جۇگىرۋ مارافونىنا 2 مىڭ اتىراۋلىق قاتىسۋعا نيەت بىلدىرگەن.
بۇل تۋرالى اتىراۋ وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە ۇيىمداستىرۋشىلار كوميتەتىنىڭ وكىلى، باس تورەشى يۋري پونوماريەۆ ءمالىم ەتتى.
سپيكەردىڭ ايتۋىنشا، مارافونعا قاتىسۋشىلار ەكى قاشىقتىق بويىنشا جۇگىرەدى.
«10 شاقىرىم قاشىقتىققا دەيىن جۇگىرۋ «اتىراۋ» حالىقارالىق اۋەجايىنان باستاۋ الادى. 21 شاقىرىمعا جۇگىرۋ «مۇنايشى» ستاديونىنان باستالادى. مارافونعا قاتىسۋشىلارمەن بىرگە پوليتسيا مەن جەدەل جاردەم قىزمەتكەرلەرى، ارنايى اۆتوبۋس تا شىعادى. سونىمەن قاتار، جولدار بويىنا سۋ تاراتاتىن ستاتسيونارلى پۋنكتتەر مەن مەديتسينالىق بەكەتتەر ورنالاستىرىلادى» ، - دەپ اتاپ ءوتتى باس تورەشى يۋري پونوماريەۆ.
ايتا كەتۋ كەرەك، مارافونعا قاتىسامىن دەۋشىلەردى تىركەۋ ءالى دە جالعاسۋدا. بۇگىنگە دەيىن تىركەلگەن ەڭ ەگدە مارافونشىنىڭ جاسى 74 تە.
اۋقىمدى سپورت مەرەكەسىن قولداۋ ماقساتىندا اتىراۋعا گيننەسس رەكوردتار كىتابىنا جەتى رەت ەنگەن ايگىلى مارافونشى مارات جىلانبايەۆ، وليمپيادا چەمپيونى ولگا شيشيگينا جانە ەسترادا جۇلدىزى قايرات نۇرتاس ارنايى كەلەدى.
6 - مامىر كۇنى وبلىس ورتالىعىنداعى «مۇنايشى» ستاديونىندا قايرات نۇرتاستىڭ كونسەرتى وتەدى.
بايان جانۇزاقوۆا
