پرەزيدەنتتىككە كانديداتتار مەديتسينالىق كۋالاندىرۋدان وتەدى
بۇل تۋرالى بۇگىن ماجىلىستە «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋتسيالىق زاڭ جوباسىن تانىستىرۋ بارىسىندا ق ر ادىلەت ءمينيسترى مارات بەكەتايەۆ ءمالىم ەتتى، دەپ حابارلايدى قازاقپارات.
«اتاپ ايتقاندا، «سايلاۋ تۋرالى» كونستيتۋتسيالىق زاڭىندا سايلاۋشىلار مەن سايلاۋ ۇدەرىسىنە قاتىسۋشىلاردىڭ قۇقىقتىق ساۋاتتىلىعىن ارتتىرۋ ماقساتىندا تۇزەتۋلەر كوزدەلگەن. پرەزيدەنتتىككە كانديداتقا قويىلاتىن قوسىمشا تالاپتار ەنگىزىلەدى. وسى ورايدا مەملەكەتتىك قىزمەتتە نەمەسە سايلاناتىن مەملەكەتتىك لاۋازىمداردا كەمىندە 5 جىل تاجىريبەسىنىڭ بولۋى، مىندەتتەرىن ورىنداۋعا كەدەرگى بولاتىن اۋرۋلاردىڭ جوقتىعىن راستاۋ ەسكەرىلگەن. ول ءۇشىن مەديتسينالىق كۋالاندىرۋدان وتەدى»، - دەدى مينيستر.
تىلشىلەرگە بەرگەن سۇحباتىندا م. بەكەتايەۆ تالاپ بارلىق كانديداتتارعا مىندەتتى بولاتىنىن جەتكىزدى.
بۇل رەتتە تالاپتار ناقتى جازىلىپ، اتقارىلاتىن راسىمدەر اشىق ءارى تۇسىنىكتى تۇردە اتاپ كورسەتىلەدى.
«ەگجەي-تەگجەيلى رەتتەۋ شارالار كەيىنىرەك بەكىتىلەدى. ماڭىزدى مەملەكەتتىك قىزمەتتەردى ورىنداۋ ءۇشىن كانديداتتار وسىعان دايىن بولۋى ءتيىس»، - دەپ توقتالدى مينيستر.
اۆتور: رۋسلان عابباسوۆ
