كەرتيس سكاپارروتتي: ا ق ش ەۋروپاعا اۋىر اسكەري تەحنيكاسىن جىبەرۋى كەرەك
اسكەري گەنەرال «رەسەي قارۋلى كۇشتەرىنە قارسى تۇرۋ ءۇشىن ەۋروپا قۇرلىعىنا كەز كەلگەن شابۋىلعا توتەپ بەرە الاتىن اۋىر برونەتانكتىك كۇشتەر قاجەت» ەكەنىن باسا ايتتى.
- بۇل ايماقتا رەسەيدىڭ قارۋلى كۇشتەرى وتە مىقتى. اۋىر ارتەللەرياسى مەن تەحنيكاسى بار. رەسەي كۇشتەرىنە قارسى دۇرىس پوزيتسيا ۇستانۋىمىز ءۇشىن بىزگە برونەتانكتىك اسكەري تەحنيكا كەرەك. قازىر بىزدە بار-جوعى روتاتسيالىق ءبىر عانا بريگادا بار. بۇل كۇش وتە جەتكىلىكسىز»، - دەپ مالىمدەدى ن ا ت و- نىڭ بىرىككەن قارۋلى كۇشتەرى اكىمشىلىگىنىڭ باس قولباسشىسى كەرتيس سكاپارروتتي.
امەريكانىڭ باس قولباسشىسى ا ق ش كونگرەسىنىڭ الدىندا سويلەگەن سوزىندە «رەسەيلىك ارميانىڭ تەگەۋرىنىن توقتاتۋ ءۇشىن اسكەري كۇشتىڭ جەتكىلىكسىز» ەكەنىن العا تارتتى. امەريكالىق اسكەري قولباسشىنىڭ حابارلاۋىنا قاراعاندا، «سوڭعى التى جىلدا ورىس ارمياسى قايتا جابدىقتالىپ، جاڭعىردى. رەسەيدىڭ اركتيكا ايماعىنداعى اسكەري قارۋلى كۇشتەرى دە قۋاتتى. سوندىقتان ا ق ش پەن ن ا ت و ۇيىمى قاراپ قالماي، ءوز اسكەرىن قايتا جاڭعىرتۋعا مىندەتتى».
ەندى رەسەي اسكەرىنەن شوشىناتىنداي ەۋروپالىق اۋماققا قانشالىقتى قاۋىپ ءتونىپ تۇر؟ ەندى بۇل جاعى بەيمالىم. ءبىراق كەيبىر مەملەكەتتەردىڭ الاڭداپ وتىرعانىن دا جوققا شىعارۋعا بولمايدى. مىسالى، ەل پارلامەنتىنىڭ الدىندا سويلەگەن سوزىندە ەستونيانىڭ پرەمەر-ءمينيسترى «رەسەيدىڭ وسى ايماقتاعى اسكەري بەلسەندىلىگى» ەلگە قاۋىپ توندىرەتىنىن ءمالىم ەتتى.
ءبىراق بۇل قانشالىقتى اقيقات؟ الدىن الا الاڭداۋشىلىق قانا شىعار...
بەرىك بەيسەن ۇلى
«ايقىن» گازەتى
