قوس قىزى دا اعىلشىنعا تۇرمىسقا شىققان انا ەلگە جانايقايىن جەتكىزدى

استانا. قازاقپارات - قازىرگى تاڭدا قازاق قوعامىندا ارالاس نەكە ماسەلەسى وزەكتى تاقىرىپقا اينالعان.

اسىرەسە شەتەلدىكتىڭ ەتەگىنەن ۇستاعان قازاق قىزدارىنىڭ تاعدىرى جۇرتشىلىقتى كوپ الاڭداتۋدا. قوس قىزى دا اعىلشىن جىگىتىنە تۇرمىسقا شىعىپ، ولاردى جىلداپ كورمەيتىن الماتىلىق انا NUR. KZ پورتالىنا جالعىزباستى ايەلگە قالاي اينالعانىن بايانداپ بەردى.

«ءوزىم سولتۇستىك قازاقستان وبلىسىنىڭ تۋماسىمىن. الماتىعا وقۋ ىزدەپ كەلىپ، وسىندا تۇرمىسقا شىعىپ قالىپ قويدىم. الايدا جولداسىم تارازدىڭ جىگىتى بولدى. ۇرىپ-سوعىپ، ىشىمدىك ءىشىپ، كورسەتپەگەندى كورسەتكەن سوڭ ونىمەن اجىراسىپ كەتتىم.

ەكى قىزىمدى ءوزىم تاربيەلەپ، وقىتتىم، توقىتتىم. كۇن-ءتۇن دەمەي جۇمىس ىستەپ ءجۇرىپ، الماتىدان پاتەر ساتىپ الدىم. تۇرمىسقا شىقپادىم. جاس كەزىمدە كورمەگەن قىزىقتى كەيىن قىزدارىم كورسەتەدى دەپ سەنەتىنمىن. ءبىراق قازىر جالعىزبىن»، - دەپ اڭگىمەلەدى وڭداسىن اپا.

«قىزدارىم وڭ-سولىن تانىپ، وقۋىن بىتىرگەن سوڭ شەتەل اسامىن دەگەندى شىعاردى. باستاپقىدا ۇلكەن قىزىم كەتپەك بولدى. «ماما، مەن قازاقستاندا قالعىم كەلمەيدى. دوستارىمنىڭ بارلىعى شەتەلگە كەتىپ جاتىر»، - دەپ قويماي قويدى. «تاۋەكەل» دەپ وعان رۇقساتىمدى بەردىم.

كەيىننەن وندا كەتكەن قىزىم ءبىر جىلداي حابارسىز كەتتى. ول كەزدە 2004-جىلدارى قازىرگىدەي بايلانىس تا دۇرىس دامىماعان. سويتسەم قىزىم وندا بارىپ اعىلشىن جىگىتىنە تۇرمىسقا شىعىپتى. كەيىن ءبىر جىلدان سوڭ عانا ءبىلدىم. وندا بارىپ ول قارىق قىلىپ جۇمىس ىستەمەپتى دە. ون جىلدان استى كۇيەۋ بالامدى ءالى كورمەدىم. قىزىم ەكى-اق رەت كەلدى. ەكى بالاسى بار. قازاقشا ءبىر اۋىز ءسوز بىلمەيدى»، - دەيدى ول.

ال ەكىنشى قىزى ودان كەيىن ەكى جىلدان سوڭ شەتەل اسۋعا بەل بۋعان ەكەن. ونىڭ دا تاعدىرى اپكەسىنىكىنە ۇقساس بولىپ، لوندون تۇرعىنىمەن وتباسىن قۇرعان. وسىلايشا انا ەكى قىزىنىڭ دا تەگى مۇسىلمان ەمەس، قازاقستانعا ەشقاشان كەلگىسى كەلمەيتىن، قازاق تۋرالى ەشقانداي مالىمەت بىلگىسى كەلمەيتىن شەتەل ازاماتتارىنا تۇرمىسقا شىققانىن ايتىپ كوز جاسىن تىيا المادى.

«نەمەرەلەرىمدى ومىرىمدە بىرنەشە رەت قانا كوردىم. كۇيەۋ بالالارىم كەلمەيدى. مەنى سوندا قىدىرتۋعا الىپ كەتەمىن دەيتىن، ءبىراق جاعدايلارى دا وزدەرى ويلاعانداي كەرەمەت ەمەس بولىپ كورىندى. ەش نارسەسىن بىلمەيمىن. قازىر تەلەفونمەن سويلەسىپ تۇرامىز. ءبىراق كۇننەن كۇنگە بويىمنان ءال كەتىپ، قارتايىپ بارا جاتىرمىن. قارتايعان شاعىمدا سۇيەۋ بولاتىن قىزدارىم جىراقتا ءجۇر»، - دەپ مۇڭايدى ول.

«قىزدارىمنىڭ ۇرپاعى ەندى قازاق بولمايدى. وزدەرى دە مۇندا كەلەدى دەپ ۇمىتەنبەيمىن. مۇسىلماندىقتان دا الىس. سول ءۇشىن الاڭدايمىن. جۇرەگىم ورنىندا ەمەس»، - دەگەن انا ءوزىنىڭ تاعدىرى ەلگە ساباق بولسىن دەگەن ماقساتپەن حابارلاسىپ وتىرعانىن ايتتى.