قانات يسلامدى سىنعا العاندار تانىمال بلوگەردىڭ كۇلكىسىن كەلتىردى
ول قاناتقا ايتىلعان سىندى ءوز اتىن بۇركەگەن وزىنە سەنىمسىز ادامداردىڭ جازعانىن ايتادى. بۇل تۋرالى ونىڭ الەۋمەتتىك جەلىدەگى پاراقشاسىنان بەلگىلى بولدى دەپ حابارلايدى NUR. KZ.
بەرىك سۇلتان بۇل پىكىردى «ادىلەت ىزدەۋشىلەرگە» ارناعان.
«بىرىنشىدەن، ادام ەگەر سىنىنا سەنىمدى بولسا ماقالاسىنا بۇركەنشە ەسىم قولدانبايدى. وزىنە دە سوزىنە دە سەنىمسىز ادامدار وسىلاي كورپە استىنان كۇڭكىلدەيدى. سوسىن، «كوپتەن بەرى جازا الماي، قولىمىز بوساماي» دەپ باستاعان ماقالاسىنان-اق مۇنىڭ ءبىر ادام جازباعانىن اڭعارۋعا بولادى. ياعني قاناتقا قاتىستى جاعىمسىز اقپارات جازۋ ءبىر ادامنىڭ ەمەس، بىرنەشە ادامنىڭ يدەياسى. بۇل جازعانىنان انىق كورىنىپ تۇر. «ەلدىڭ قامىن ويلايتىن ءبىر ۇل تۋسا، ونى قاباتىن ەكى ءيت قوسا تۋىلادى» دەپ ايتقان بابالار ءسوزىنىڭ راستىعىن-اي!»، - دەپ تاڭدانادى ول.
قاناتتىڭ كاسىپقوي رينگتە جەتىستىگى جوقتىعىن جازعان ماقالا اۆتورىنا بوكسشى PR مەنەدجەرىنىڭ كۇلكىسى كەلگەن. ونىڭ ايتۋىنشا، بۇل سوزدەر شىن جاناشىر ەمەس، كورە الماۋشى پىكىردى ۇستاناتىن ادامنىڭ اۋزىنان شىعىپ وتىر.
«قاناتتىڭ سالماعىندا الەم بويىنشا 1793 بوكسشى بار. سول بوكسشىلاردىڭ ىشىندە قازىر قانات 54- ورىندا. بۇل ولارشا جەتىستىك ەمەس پە؟ بۇكىل الەمدىك WBA تۇجىرىمى بويىنشا قانات يسلام 4- ورىندا تۇر. WBO تۇجىرىمى بويىنشا 6- ورىندا، IBF بويىنشا 13- ورىندا تۇر. الەمدىك رەيتينگ بۇل. الەم بوكسشىلارىنىڭ اراسىنان 4- ورىندا تۇرۋدى جەتىستىك دەپ ەسەپتەمەسە، وندا بىلمەيمىن. قانات WBA fedelatin, WBO intercontinental بەلبەۋىن جەڭىپ الدى. سول تۇجىرىمنىڭ چەمپيونى. سوندا قۇرلىقارالىق چەمپيون بولۋدى دا جەتىستىك ەمەس دەپ وتىرعان بولدى عوي»، - دەگەن بەرىك سۇلتان ماقالا اۆتورىن بوكستى مۇلدە تۇسىنبەيتىن ناعىز ساۋاتسىزدىڭ وزىنە تەڭەدى.
سونداي-اق ول جەلىدەگى جازباسىندا قاناتتى كارى بوكسشى دەپ اتاعان ماقالا اۆتورىنا الەم بويىنشا جاسى قىرىقتان اسسا دا جۇدىرىقتاسىپ جۇرگەن سپورتشىلاردى مىسالعا كەلتىرگەن.
ماقالا اۆتورىنىڭ «قانات ەلگە ءجيى كەلگىشتەپ كەتتى» دەگەن سىنى بەرىك سۇلتاننىڭ ويىنشا قيسىنعا كەلمەيتىن ءسوز.
«ءسىز دە بۇل سوزگە كۇلگەن شىعارسىز؟! ەندى ءوز ەلىنە كەلمەي قايدا بارادى؟! قانات قازاقستاننىڭ ازاماتى. قازاقتىڭ قازاقستانعا نەگە كەلە بەرەدى دەگەنى اقىلى بار ادام ءۇشىن ءبىرتۇرلى سۇراق قوي ءيا؟!»، - دەيدى ول جازباسىندا.
بەرىك سۇلتان قاناتتىڭ گەننادي گولوۆكينمەن رينگكە شىقپايتىنى تۋرالى پىكىرىن سىنعا العان ماقالا اۆتورىن ەكى قازاقستاندىق بوكسشىنى توبەلەستىرگىسى كەلەتىن پيعىلى بار ادام دەپ توپشىلادى.
«بۇل ءبىر ماقالامەن قاناتتىڭ ابىرويى تۇسپەيدى. سوسىن بۇل ماقالانى بىرەۋلەر ايتقانداي سىن دەپ تە قابىلداۋعا بولمايدى. سەبەبى سىن ايتىلعان جەردە جول كورسەتىلەدى. ۇسىنىس قوسا ايتىلادى. ال الگى ماقالا تەك قارالاۋ، شابۋىلداۋ. سونى سايتىنا جاريالاۋشىلاردىڭ دا ۇلتتىق سۇزگى جوق ەكەنى كورىنىپ تۇر. ايتپەسە شۋ شىعاتىن، پايداسىز ماقالالاردىڭ كەرەگى نە؟! الدە قوعامدا ءبارى ايتىلىپ، ايتىلماعان قاناتتىڭ تيتۋلى عانا قالىپ پا ەدى؟!»، - دەپ تۇيىندەيدى ءوز ءسوزىن قانات يسلامنىڭ PR- مەنەدجەرى.
