09:33, 04 - مامىر 2017 | GMT +5
ازيا بوكس كونفەدەراتسياسى لەۆيتتى دىچكومەن شاتاستىرىپ الدى
استانا. قازاقپارات - ازيا بوكس كونفەدەراتسياسىنىڭ ASBC Facebook -تەگى رەسمي پاراقشاسىندا تاشكەنتتە ءوتىپ جاتقان ازيا-2017 چەمپيوناتىنداعى ايقاستاردىڭ ءبىرىنىڭ ناتيجەسى قاتە جاريالاندى.
«قازاقستاندىق يۆان دىچكو 91 كەلىگە دەيىنگى سالماق دارەجەسىندە وزبەكستاندىق سانجار تۇرسىنوۆتى جەڭدى»، - دەلىنگەن ASBC- ءدىڭ الەۋمەتتىك جەلىدەگى جازباسىندا.
ايتا كەتەيىك، شىندىعىندا ازيا-2017 چەمپيوناتىندا اتالمىش سالماق دارەجەسىندە قازاقستاننىڭ اتىنان ۆاسيلي لەۆيت قاتىسىپ، تۇرسىنوۆتى جەڭگەن بولاتىن. وسىلايشا ول جارتىلاي فينالعا شىققان ەدى.
ال قازاقستاندىق بوكسشى يۆان دىچكوعا كەلەتىن بولساق، ول اقپان ايىندا كاسىپقوي رينگكە اۋىساتىنىن جاريالادى، الايدا ءالى كۇنگە دەيىن پروفي-رينگتە جۇدىرىقتاسقان ەمەس. سونداي-اق، ول ازيا-2017 چەمپيوناتىنا مۇلدەم قاتىسقان جوق.
