ەلىمىزدە جۇمىسسىزدار دارىگەرگە قارالۋ ءۇشىن اي سايىن اقشا تولەيتىن بولدى

استانا. قازاقپارات - دارىگەرگە كورىنۋ ءۇشىن ساعاتتاپ كەزەككە تۇراتىن ناۋقاستار ەندى تىپتەن كوبەيەتىن سياقتى.

ويتكەنى، جاڭا جىلدان باستاپ ەلىمىزدە مىندەتتى مەديتسينالىق ساقتاندىرۋ جۇيەسى ەنگىزىلەدى. ناعىز ايعاي- شۋدىڭ كوكەسى ەندى باستالۋى مۇمكىن. ءماجىلىس سپيكەرى نۇرلان نىعماتۋللين حالىقتىڭ دۇرلىگۋىنە جول بەرمەۋ كەرەكتىگىن، مينيسترگە قازىردەن باستاپ ەسكەرتىپ جاتىر. سونىمەن، 1 -قاڭتاردان باستاپ ەنگىزىلگەلى تۇرعان جاڭا جۇيە بويىنشا كىمدەر تەگىن ەم الا الادى؟ جۇمىسسىزدار جەدەل جاردەم شاقىرۋ ءۇشىن قورعا اقشا تولەۋى ءتيىس پە؟

بۇل تۋرالى 31 ارنا حابارلايدى.

الداعى جىلدان باستاپ ەنگىزىلەتىن ساقتاندىرۋ جۇيەسىنىڭ ەرەجەلەرىن كەشە مينيستر ەلجان ءبىرتانوۆ دەپۋتاتتارعا ءوزى تانىستىردى. جاڭا زاڭ جوباسى بويىنشا شىلدەنىڭ بىرىنەن باستاپ جۇمىس بەرۋشىلەر ءار قىزمەتكەرى ءۇشىن جالاقىسىنىڭ 1، ءبىرىنشى قاڭتاردان 1,5 پايىزىن تولەپ وتىرۋى ءتيىس. دەمەك، ءاربىر جۇمىس ىستەيتىن ازامات وسى اقشامەن ءوزى تاڭداعان ەمحاناسىنان ەم الۋىنا بولادى. ال 14 سانات بويىنشا، ياعني، بالالار مەن كوپ بالالى انالار، مۇگەدەكتەر، زەينەتكەرلەر، ستۋدەنتتەر جانە الەۋمەتتىك از قورعالعان جاندارعا جارنانى مەملەكەت قۇيادى...

«مەديتسينالىق ساقتاندىرۋ قورىنىڭ تارابىنان بولىنگەن قارجى ساقتاندىرۋ جۇيەسىنە كىرگەن ازاماتتارعا ارنالسا. جۇمىس بەرۋشى نە ءوزى، نەمەسە مەملەكەت تولەۋى كەرەك»، - دەيدى ق ر دەنساۋلىق ساقتاۋ ءمينيسترى ەلجان ءبىرتانوۆ.

ءمينيستردىڭ ايتۋىنشا، ەلىمىزدەگى ەكى ميلليوننان استام جۇمىسسىزدار قورعا اقشانى قالتاسىنان، ياعني ايىنا 1400 تەڭگەدەن تولەپ وتىرۋى ءتيىس. مۇنداي قارجى تاپپاعاندار پروفيلاكتيكالىق ەم الىپ، دارىگەرگە تەكسەرىلە المايدى. ەكى قولعا ءبىر كۇرەك تاپپاي سەندەلىپ جۇرگەندەر تەك جەدەل جاردەم شاقىرتىپ، شۇعىل كومەكتەردى تەگىن الۋعا عانا قۇقىلى...

«اۋىرىپ كەلىپ وتىرسا ەكسترەننو جاعداي وندا وعان كومەك كورسەتىلەدى. جەدەل جاردەم كومەگى دە، تەمپەراتۋراسى دا كوتەرىلسە دە كەپىلدەنگەن كومەك كورسەتىلەدى»، - دەيدى ق ر پارلامەنتى ءماجىلىسىنىڭ دەپۋتاتى زاۋرەش امانجولوۆا.

جاڭا جىلدان باستاپ ەنگىزىلەتىن جاڭا جۇيەنى تاپتىشتەپ ءتۇسىندىرىپ تۇرعان مينيستر، ناۋقاستىڭ قانداي ساناتقا جاتاتىنىن كىم انىقتايدى دەگەن ساۋالعا كەلگەندە توسىلىپ قالدى. دەپۋتاتتار، اۋىرىپ تۇرعان ادامدى ەمدەۋدىڭ ورنىنا دارىگەرلەر كومپيۋتەردەن دەرەك ىزدەپ وتىرا ما دەپ شىقتى. الايدا، ەلجان ءبىرتانوۆ ناۋقاستىڭ قانداي ساناتقا جاتاتىنىن «ازاماتتارعا ارنالعان ۇكىمەت» سايتى ارقىلى انىقتايمىز جانە بۇل جۇمىستاردى جازعا دەيىن بىتىرەمىز دەپ ۋاقىتىنان شاتاسا باستادى. ءمينيستردىڭ بۇل جاۋابىن ۇناتپاعان ءتوراعا، ەمدەلۋگە كەلگەن جۇرتتى تىركەۋ كەزىندەگىدەي دۇرلىكتىرمەي، ۇيىمداستىرۋ جۇمىستارىن تەزدەتىپ بىتىرۋگە شاقىردى...

«مەديتسينا قىزمەتكەرلەرىنەن باستاۋ كەرەك، ەلجان امانتايەۆيچ، 1 -قاڭتار ەمەس، مەديتسينالىق مەكەمەلەرگە تىركەلگەن بارلىق ساناتتاعى ادامداردىڭ ءتىزىمى بولۋى كەرەك»، - دەيدى ق ر پارلامەنتى ءماجىلىسىنىڭ ءتوراعاسى نۇرلان نىعماتۋللين.

مىندەتتى مەديتسينالىق ساقتاندىرۋدى ەنگىزۋگە ەڭ الدىمەن حالىقتى ەمەس، دارىگەرلەردىڭ ءوزىن ازىرلەۋدى سۇراعان دەپۋتاتتار زاڭ جوباسىن اقىرى ءبىراۋىزدان ماقۇلداپ بەردى. ەندى، ونسىز دا قولدارى جازۋدان بوسامايتىن اق حالاتتىلارعا جاڭا جۇمىس تابىلدى. دارىگەرلەر جاڭا جىلعا دەيىن 17 ميلليون حالىقتى تىركەپ، ءارقايسىسىنىڭ قاي ساناتقا جاتاتىنىن انىقتاپ ۇلگەرۋى ءتيىس.