قىزىلوردالىق جاس ءانشى حالىقارالىق بايقاۋدىڭ باس جۇلدەسىن جەڭىپ الدى

قىزىلوردا. قازاقپارات-  قىزىلوردالىق جاس تالانت ايگەرىم ومىربەك حالىقارالىق «جاڭا جۇلدىز» كونكۋرسىنىڭ «گران-پري» جۇلدەسىن جەڭىپ الدى، - دەپ حابارلادى قازاقپارات ح ا ا ءتىلشىسى وبلىستىق مادەنيەت باسقارماسىنا سىلتەمە جاساپ.

استانا قالاسىندا «ەكسپو-2017» كورمەسى قارساڭىندا «قازاقستان تالانتتارى» شىعارماشىلىق قوزعالىسىنىڭ ۇيىمداستىرۋىمەن Ⅱ حالىقارالىق «جاڭا جۇلدىز» كونكۋرس-فەستيۆالى ءوتتى.

بايقاۋعا بارلىعى 5-40 جاس ارالىعىنداعى 1500 ۇمىتكەر قاتىستى. ولار ونەردىڭ بارلىق جانر تۇرىنەن ياعني ءان-ءبي، اسپاپتار، ەسترادا-ۆوكال، حالىقتىق شىعارمالارى بويىنشا سىنعا ءتۇستى.

كونكۋرسقا  قىزىلوردا وبلىسىنان قاتىسقان اسقار توقماعامبەتوۆ اتىنداعى مادەنيەت ءۇيىنىڭ جانىنان قۇرىلعان قالا اكىمىنىڭ «مەرەكە» اسپاپتىق ءانسامبلىنىڭ ءانشىسى، بىرنەشە بايقاۋلاردىڭ جەڭىمپازى ايگەرىم ومىربەك بايقاۋدىڭ ەسترادا-ۆوكال نوميناتسياسى مەن «گران-پري» جۇلدەسىن جەڭىپ الدى.

«بۇعان دەيىن دە بىرنەشە كونكۋرستاردا باعىمدى سىناپ ءجۇردىم. دەگەنمەن بۇل بايقاۋدان العان اسەرىم ەرەكشە. قارسىلاستارىم دا وسال بولمادى. ءاربىر قاتىسۋشى ءوز ەلىنىڭ، وڭىرلەرىنىڭ تالانتتى ونەرپازدارى. بايقاۋ جوعارى دەڭگەيدە ۇيىمداستىرىلعان جانە وتە ءادىل ءوتتى دەپ ويلايمىن»، - دەيدى بايقاۋدان كەيىنگى ءوز اسەرىمەن بولىسكەن ايگەرىم.