ازيا چەمپيوناتى: قازاقستاندىق سەگىز بوكسشى جارتىلاي فينالعا جولداما الدى

استانا. قازاقپارات - تاشكەنت قالاسىندا بوكستان ءوتىپ جاتقان ازيا چەمپيوناتىندا قازاقستاندىق سەگىز سپورتشى جارتىلاي فينالعا جولداما الدى، دەپ حابارلايدى «قازاقپارات» ءتىلشىسى.

«قازسپورت» تەلەارناسىنان تىكەلەي ەفيردە كورسەتكەنىندەي، 52 كەلى سالماقتا شيرەك فينالدىق باسەكەدە ازامات يساقۇلوۆ مالايزيالىق ابدۋل سالام كاسيمدى ۇپاي سانىمەن ۇتتى.

سودان كەيىن ابىلايحان ءجۇسىپوۆ جارتىلاي فينالعا جولداما الدى. ول ماماندار «قازاق سالماعى» دەپ اتاپ كەتكەن 69 كەلىدە قىتايلىق ۆەي ليۋدى تىزە بۇكتىردى. وتكەن جىلى بۇل سالماقتا باتىس قازاقستان بوكسىنىڭ تۇلەگى دانيار ەلەۋسىنوۆ ريو وليمپياداسىنىڭ چەمپيونى اتانىپ، كەيىن كاسىپقوي بوكسقا اۋىسقان بولاتىن.

ەندى جيىرما جاسار ابىلايحاننىڭ سول دانياردىڭ ورنىن باسار دەگەن ءۇمىت بار. 81 كەلى سالماقتا قوس بىردەي وليمپيادانىڭ كۇمىس جۇلدەگەرى ادىلبەك نيازىمبەتوۆ پەن ريو دوداسىنان كەيىن وسى سالماققا اۋىسقان جانىبەك ءالىمحان ۇلى جاراقات الىپ قالعاندىقتان، تاشكەنتكە ەل نامىسىن قورعاۋعا ەرىك ءالجانوۆ اتتانعان ەدى.

ول شيرەك فينالدا پاكىستاندىق الي اۆايس حاندى 5:0 ەسەبىمەن جەڭدى. اسا اۋىر سالماقتا قامشىبەك قوڭقابايەۆ ءۇندىستاندىق ساتيش كۋماردان 5:0 ەسەبىمەن باسىم ءتۇستى.

ەسكە سالا كەتەيىك، بۇعان دەيىن 75 كەلى سالماقتا ءابىلحان امانقۇل سيريالىق ابدۋل ازيزدى ءۇش مارتە نوكداۋنعا جىبەرىپ، جەكپە-جەگىن ءبىرىنشى راۋندتا-اق جەڭىسپەن اياقتاعان بولاتىن.

سونداي-اق قايرات ەراليەۆ (56 كەلى) ، بەكداۋلەت يبراگيموۆ (64 كەلى) جانە ۆاسيلي ليەۆيت (91 كەلى) جارتىلاي فينالعا جولداما السا، تەك ەرجان جومارت (49 كەلى) پەن ادىلەت قۇرمەتوۆ (60 كەلى) قانا جارىستى ەرتە اياقتاپ، جۇلدەگەرلەر قاتارىنان كورىنە المادى.

اۆتور: ەلجان ەرالى