07:07, 04 - مامىر 2017 | GMT +5
شەكارادا ءتول قۇجات تەكسەرۋ توقتاتىلدى
استانا. قازاقپارات - بۇدان بىلاي شۆەتسيا شەكاراسىندا كورشى دانيادان اۆتوبۋس، پويىز نەمەسە كەمە ارقىلى كەلگەن ازاماتتاردىڭ ءتول قۇجاتى تەكسەرىلمەيدى، دەپ جازادى «حابار 24».
2015-جىلى كوشى-قون احۋالىنا بايلانىستى ەكى ەل شەكاراسىندا باقىلاۋ ەنگىزىلگەن.
الايدا جەرگىلىكتى بيلىكتىڭ ايتۋىنشا، ونى ۇزارتۋدىڭ ەش قاجەتى جوق. ويتكەنى سوڭعى ۋاقىتتا ەلگە اعىلعان ميگرانتتار سانى كۇرت ازايدى. ونىڭ ۇستىنە بۇل حالىق ءۇشىن دە قولايسىز.
سەبەبى مىڭداعان تۇرعىن دانيادا، ال دانيالىقتار كەرىسىنشە شۆەتسيادا جۇمىس ىستەيدى. ءبىراق كۇندەلىكتى ءتول قۇجات تەكسەرۋ كەسىرىنەن ەكى ورتادا قاتىناۋ قيىنداپ كەتتى.
سالدارىنان بىرەۋلەر جۇمىسىن، ەندى باسقالارى تۇرعىلىقتى ورنىن اۋىستىرعان. ەسەسىنە ەندى شۆەتسيا بيلىگى شەكاراداعى باقىلاۋدى وزگە جولمەن كۇشەيتۋ شارالارىن قولعا الىپ وتىر.
مۇندا كولىك نومىرلەرىن اۆتوماتتى تۇردە انىقتايتىن كامەرالار ورناتىلىپ، تەمىر تۇلپارلار رەنگتەن كومەگىمەن سكانەرلەنەدى.
