قىتايدا قازاق حالقىنىڭ ۇلتتىق قۇندىلىقتارى ۇلىقتالعان مەرەكە ءوتتى - فوتو

استانا. قازاقپارات - قىتايدىڭ گانسۋ ولكەسىنىڭ اقساي قازاق اۆتونوميالىق اۋدانىندا تۇراتىن قانداستارىمىز ۇلتتىق قۇندىلىقتارىمىزدى ۇلىقتاعان مەرەكەلىك شارا ۇيىمداستىردى، دەپ حابارلايدى قازاقپارات kazakh.people.com.cn سايتىنا سىلتەمە جاساپ.

 ىشكى قىتاي جەرىندە ورنالاسقان، قازاق مادەنيەتىنىڭ شىعىستاعى ءبىر وشاعى سانالاتىن اقساي اۋدانىندا تۇرىپ جاتقان قانداستارىمىز 1 - مامىر - حالىقارالىق ەڭبەكشىلەر كۇنىن اتاپ وتە وتىرىپ، ۇلتتىق مادەنيەتىمىزدى دارىپتەيتىن مەرەكەلىك شارا ۇيىمداستىردى. ونىڭ بارىسىندا الامان بايگە، قىز قۋۋ، كوكپار تارتۋ سىندى ۇلتتىق سپورت تۇرلەرىنەن جارىستار ءوتتى. سونىمەن بىرگە قازاق ءانىن اۋەلەتكەن اقساي اۋداندىق ءان- بي ۇجىمىنىڭ كونسەرتى دە كوپشىلىكتىڭ ىقىلاسىنا بولەندى.

اتالمىش قىتايلىق ب ا ق- تىڭ جازۋىنشا، اقساي اۋدانى بيىلعى مامىر ايىنان قازان ايىنا دەيىن 6 رەت ات بايگەسىن وتكىزۋدى جوسپارلاپ وتىر. ولاردىڭ بارىسىندا الامان بايگە، قۇنان بايگە، جورعا جارىستارىنان بولەك، قىز قۋۋ، كوكپار تارتۋ، ات ءۇستى ونەرى سەكىلدى ۇلتتىق سپورت ويىندارى ۇيىمداستىرىلماق. سونداي- اق قازاق تاعامدارىن دارىپتەپ، ۇلتتىق ءان- ءبيىمىزدى ارقاۋ ەتكەن كونسەرتتىك باعدارلاماردى كورسەتۋدى ماقسات ەتۋدە. اۋدان حالقى ۇلتتىق مادەنيەتىمىزدى وزگە ۇلت وكىلدەرىنە كورسەتۋ ارقىلى جەرگىلىكتى تۋريزمدى دامىتۋعا دەن قويماق.

 اۆتور: باقىتجول كاكەش