داريا سۋى كۇندىز- ءتۇنى باقىلانۋدا

   قىزىلوردا. قازاقپارات- سىرداريا وزەنى بۇعان دەيىن حابارلانعانداي، قازىر مول سۋدى قابىلداپ جاتىر.

 ارال- سىرداريا باسسەيندىك ينسپەكتسياسى مالىمەتتەرىنە سۇيەنسەك، ناق وسى كۇندەرى قىرعىز اعايىنداردىڭ توقتاعۇل سۋ قويماسى مەن جولداعى وزگە دە سۋ جينايتىن قويمالاردان سەكۋندىنا 1190 تەكشە مەتر سۋ شارداراعا تۇسۋدە. ودان تومەن قاراي سەكۋندىنا 1500 تەكشە مەتر سۋ بوساتىلۋدا، دەپ حابارلادى قازاقپارات ح ا ا ءتىلشىسى.

 شارداراداعى قازىرگى سۋ مولشەرى 4 ميلليارد 785 ميلليون تەكشە مەتردى قۇرايدى. كوكساراي سۋ رەتتەگىشىندە 2 ميلليارد 883 ميلليون تەكشە مەتر سۋ بار. رەتتەگىش شەكتى مەجەسىنە جەتىپ تۇرعاندىقتان سۋ قابىلدامايدى، نە ونى تومەن قاراي جىبەرمەيدى. وزبەك تاراپىمەن كەلىسىم نەگىزىندە ارناساي سۋ ويپاتى بۇگىندە سەكۋندىنا 350 تەكشە مەتر سۋدى وزىنە الۋدا. ولارمەن الداعى ۋاقىتتا دا كەلىسىم بولاتىن بولسا، ارناسايدىڭ مۇنان الدەقايدا كوپ سۋدى قابىلداۋ مۇمكىندىگى بار. سوڭعى كۇندەرى ارىس وزەنى ءبىرشاما تىنشىپ سەكۋندىنا 200 تەكشە مەتردىڭ ۇستىنە شىققان سۋ كولەمى 143 تەكشە مەترگە دەيىن ءتۇستى.

  قىزىلوردا وبلىسىنىڭ اۋماعىنا ەنتەلەي كىرگەن مول سۋدىڭ قازىرگى كولەمى 1340 تەكشە مەتردى قۇراپ وتىر. وڭتۇستىكتەگى قوس اۋداندا دا قاۋىپسىزدىك شارالارى كۇشەيتىلگەن. اتقارىلىپ جاتقان ىستەردىڭ ناتيجەسىندە  قىزىلوردا سۋ تورابىنان بۇل كۇندەرى سەكۋندىنا 518 تەكشە مەتر سۋ ءوتىپ جاتىر. داريا بويىنداعى ءقاۋىپتى سانالاتىن بارلىق ايماقتار تەگىس باقىلاۋعا الىندى. ازىرگە جاعداي تۇراقتى. دەگەنمەن اۋا- رايىنىڭ ناقتى قالاي قۇبىلارى بەلگىسىز ەكەنىن دە جوققا شىعارۋعا بولمايدى. سول سەبەپتى الداعى كۇندەرى مول سۋدى وتكىزىپ جىبەرگەنشە تاس- ءتۇيىن دايىندىق جۇمىستارى جالعاسا بەرەدى.