17:53, 03 - مامىر 2017 | GMT +5
اسكەري ازاماتتاردى جەكە باسپانامەن قامتاماسىز ەتەمىز - ۆيتسە- مينيستر مۇحتاروۆ
استانا. قازاقپارات - ق ر قورعانىس ۆيتسە- ءمينيسترى تالعات مۇحتاروۆتىڭ ايتۋىنشا، الداعى ۋاقىتتا بانكتەگى ارنايى شوتتارعا اقشا اۋدارۋ ارقىلى بارلىق اسكەري ازاماتتار جەكە باسپانامەن قامتاماسىز ەتىلەدى،
دەپ حابارلايدى قازاقپارات ءتىلشىسى.
«وسى ايدىڭ سوڭىندا ءبىز اسكەريلەردى باسپانامەن قامتاماسىز ەتۋ تۋرالى زاڭ جوباسىن ۇكىمەتكە، ودان كەيىن پارلامەنتكە تانىستىرامىز. اتالعان قۇجاتتىڭ باستى جاڭالىعى سول، ءبىز قىزمەتتە جۇرگەن بارلىق اسكەري ازاماتتاردى باسپانامەن قامتاماسىز ەتەتىن بولامىز. جوسپارعا سايكەس، ولاردىڭ بانكتەگى ارنايى ەسەپ- شوتتارىنا اي سايىن اقشا اۋدارىلادى. ءسويتىپ، جەكە باسپاناعا اقشا جينالادى. ونىڭ سوماسى ايماق پەن وتباسىنىڭ قۇرامىنا قاراي ەسەپتەلەدى»، - دەدى مۇحتوروۆ قازاقپارات تىلشىسىنە بەرگەن سۇحباتىندا.
ونىڭ ايتۋىنشا، بۇگىندە اسكەريلەردىڭ 90 پايىزى قىزمەتتىك باسپانادا تۇرادى. قىزمەتتىك پاتەر بولماسا، بيۋدجەت ەسەبىنەن جالعا الىنعان ءۇيدىڭ شىعىندارى وتەلەدى.
اۆتور: ارمان اسقاروۆ
