بيشىمبايەۆتىڭ ءىسى: شىنى زاۋىتىنىڭ قۇرىلىسى ءالى قوزعالماي تۇر

استانا. قازاقپارات - قازاقستاننىڭ دامۋ بانكىنىڭ باسشىسى بولات جامىشەۆتىڭ ايتۋىنشا، ەكى اپتادان كەيىن  قىزىلوردا قالاسىنداعى شىنى زاۋىتىنىڭ قۇرىلىسى جالعاسۋى مۇمكىن، دەپ حابارلايدى قازاقپارات ءتىلشىسى.

«زايم العان كومپانيا تەحنيكالىق اۋديت وتكىزىپ، ورىندالماي قالعان جۇمىستاردىڭ كولەمىن باعالادى. قازىر «Orda Glass» قا جاڭا باسشى تاعايىندالدى.

وتكەن اپتادا بولعان كەزدەسۋ كەزىندە ول ەكى اپتانىڭ ىشىندە مەردىگەرلەردىڭ ءتىزىمىن ۇسىناتىنىن جەتكىزدى. مەردىگەرلەردىڭ ىشىندە شەتەلدىك كومپانيالار دا بار. بۇگىندە ولار زاۋىتتى اياقتاۋعا قاجەتتى قارجىنىڭ كولەمىن، بەلگىلەنگەن سوما جەتە مە، جوق پا، سونى ءوزارا تالقىلاپ جاتىر. ەكى اپتادان كەيىن شەشىم شىعادى دەپ ويلايمىن. سول كەزدە نىساننىڭ قۇرىلىسى جالعاسادى»، - دەدى جامىشەۆ بۇگىن استانادا وتكەن باسپا ءسوز ءماسليحاتىندا.

ايتا كەتەيىك، جىلدىڭ باسىندا  قىزىلوردا قالاسىنداعى شىنى زاۋىتىنىڭ اقشاسىن جىمقىردى دەگەن ايىپپەن بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ۇستالعان بولاتىن.

«ول «بايتەرەك» حولدينگىن باسقارعاندا «Orda Glass» ج ش س جانە ونىڭ مەردىگەر ۇيىمى «شىمكەنت حيم مونتاج» ج ش س ارقىلى 1 ميلليارد تەڭگە جىمقىرۋدىڭ قىلمىستىق جوسپارىن قۇرعان. قىلمىستىق جوسپارعا اتالعان ۇيىمداردىڭ جەتەكشىلەرى د. يبراشەۆ ، ج. يسابەك جانە م. كوجابايەۆ تارتىلعان»، - دەلىنگەن سىبايلاس جەمقورلىققا قارسى ۇلتتىق بيۋرونىڭ رەسمي حابارلاماسىندا.

اتالعان سومانىڭ 2 ميلليون دوللارىن بيشىمبايەۆ ءوزىنىڭ ءىنىسى س. نۇرلىبەك ارقىلى العان.

اۆتور: ارمان اسقاروۆ