شىمكەنتتە بيىلدان باستاپ بالاباقشا سالىنبايدى
بۇل تۋرالى شاھار باسشىسى عابيدوللا ءابدىراحىموۆ كاسىپكەرلەر پالاتاسىنىڭ ايماقتىق كەڭەسىنىڭ كەڭەيتىلگەن وتىرىسىندا مالىمدەدى، دەپ حابارلايدى قازاقپارات ح ا ا ءتىلشىسى.
«بيىلدان باستاپ بالاباقشا سالمايمىز دەگەن شەشىمگە كەلدىك. بۇدان بىلاي ءار بالاعا قاجەتتى قارجىنى ءبولىپ، جەكەمەنشىك بالاباقشالارعا تولەيمىز. بۇل ەكى جاققا دا ءتيىمدى. بىرىنشىدەن، كاسىپكەرلەردىڭ جۇمىسى جۇرەدى. ەكىنشىدەن، مەملەكەت تە قاراجاتىن ۇنەمدەيدى. قۇرىلىسقا، جوبالاۋ قۇجاتتارىنا ارتىق قارجى جۇمسالمايدى. ويتكەنى بالاباقشانى كاسىپكەردىڭ سالعانى جەڭىلدەۋ. ەڭ باستىسى، بالاباقشاعا باراتىن بالالاردىڭ سانى ارتادى»، - دەدى قالا اكىمى.
ءوز كەزەگىندە كاسىپكەرلەر شىمكەنتتىك بوبەكجايلارعا مەملەكەتتەن تولەنەتىن قاراجاتتىڭ تىم ازدىعىن تىلگە تيەك ەتتى.
ماسەلەن، ايماقتىق ىسكەر ايەلدەر كەڭەسىنىڭ ءتورايىمى الما ارحابايەۆانىڭ سوزىنشە، جەكەمەنشىك بالاباقشاداعى ءار بالاعا اي سايىن بولىنەتىن 8 مىڭ تەڭگە تاماق پەن قاجەتتىلىكتەن ارتىلمايدى. ال «كەز كەلگەن كاسىپكەر تابىس تاپقىسى كەلەدى»، دەيدى ول. بۇل ماسەلەگە قاتىستى جاۋاپ قاتقان «اتامەكەن» ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ قازىر بارلىق وڭىرلەردە وسى سىندى ماسەلەلەرگە قاتىستى ۇسىنىستار تالقىلانىپ، ونى وڭتايلى شەشۋ جاعى قاراستىرىلىپ جاتقانىن اتاپ ءوتتى.
ياعني، ەلىمىزدەگى بارلىق وبلىستاردان بالاباقشالار ءۇشىن قانشا قاراجات بولىنەتىنى، ونىڭ ينفلياتسيالىق دەڭگەيى تۋرالى اقپاراتتار جيناقتالۋدا. الداعى كۇندەرى ورتاق جوبا جاسالىپ، ۇسىنىستار ۇلتتىق ەكونوميكا مينيسترلىگىنە جولداناتىن بولادى.
اۆتور: اينۇر اقبايەۆا
