شىمكەنتتىك وقۋشىلار «سابىر» اتتى روبوت جاساپ شىعاردى
قالا اكىمدىگى ۇيىمداستىرعان سايىسقا شاھارداعى 25 مەكتەپتىڭ وقۋشىلارى قاتىستى. ولار 4 باعىت بويىنشا 26 جوبا ۇسىندى، - دەپ حابارلايدى قازاقپارات ح ا ا ءتىلشىسى.
وقۋشىلاردىڭ اقپاراتتىق تەحنولوگيالارعا دەگەن يكەمىن جەتىلدىرۋ ماقساتىندا وتكىزىلگەن بايقاۋدا بالالار كومپيۋتەرلىك ونەر، موبيلدىك باعدارلاما، قىسقامەتراجدى فيلم، باعدارلامالاۋ، روبوتوتەحنيكا باعىتتارى بويىنشا باقتارىن سىنادى.
عىلىم سالاسىنا قىزىعۋشىلىعى مول، دارىندى بالالاردىڭ قاتارىندا دىبىستىق روبوت جاساپ شىققان جاس ونەرتاپقىشتار دا بولدى. ولار ءبىر جارىم ايدا سەنسورلى روبوت جاساپ شىعارىپتى.
سويلەۋگە بەيىم قۇلتەمىرلەرگە جوبا اۆتورلارى «سابىر» دەگەن اتاۋ بەرگەن.
«قۇلتەمىر باسى مەن قولىن قيمىلداتا الادى. وعان سپۋتنيكتىك انتەنانىڭ ماتەريالىن قولداندىق.
بۇدان بولەك كەز كەلگەن ساباقتاردا وقۋشىنىڭ ىنتاسىن ارتتىرۋ ءۇشىن دە وسى قۇلتەمىرلەردى پايدالانۋعا بولادى. سەبەبى، ونىڭ ىشىنە ساباقتىڭ تاقىرىبىنا بايلانىستى ماتەريالداردى سالىپ، ساقتاپ قويامىز. ونى روبوت ەركىن دىبىستاپ، وقىپ بەرە الادى»، - دەيدى بايقاۋعا قاتىسۋشى بەكنۇر قونىسبايەۆ.
IT سالاسى بويىنشا جەڭىمپاز وقۋشىلارعا اقشالاي سىيلىقتار تابىس ەتىلدى. وزگە دارىندى بالالارعا ارنايى سەرتيفيكاتتار بەرىلدى. وقۋشىلاردىڭ شىعارماشىلىقپەن اينالىسۋىنا مۇمكىندىك بەرەتىن بايقاۋ الداعى ۋاقىتتا جىل سايىن وتكىزىلىپ تۇرادى، - دەيدى ۇيىمداستىرۋشىلار.
