اتامەكەنگە كەلىپ، ونەرىن دامىتقان قانداسىمىز قادىرسۇلتان - فوتو

استانا. قازاقپارات -  ​كوشپەندى تاريحتىڭ بولمىسىن بوياۋمەن سويلەتىپ جۇرگەن قادىرسۇلتاننىڭ وسى كۇنگە دەيىن جەتكەن تابىستارى دا از ەمەس.

1987 -جىلى ق ح ر- دىڭ التاي ايماعى، شىڭگىل اۋدانىندا دۇنيەگە كەلگەن ونەر يەسىنىڭ اتاجۇرتقا كەلگەنىنە دە ون شاقتى جىلدىڭ ءجۇزى بولدى.

 ە. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ كاسىبي كوركەمسۋرەت فاكۋلتەتىن ءتامامدادى. قادىرسۇلتان ءنۇسىپقان ۇلىنىڭ بەينەلەۋ ونەرىندەگى ەڭ العاشقى جەڭىسى 2005 -جىلى وقۋشى، ستۋدەنت جاستار اراسىندا ق ح ر- دا وتكەن «بەيبىتشىلىك جانە ۋاقىت» اتتى حالىقارالىق سۋرەت جارىسىنىڭ كۇمىس جۇلدەگەرى اتانۋى.

قاراعاندى وبلىستىق «جىل سۋرەتشىسى» اتالىمىنىڭ يەگەرى. حالىقارالىق «ۇرپاققا امانات» اتتى كوركەمسۋرەت كورمەسىندە شەبەرلىك سىنىپتارى ءۇشىن I دارەجەلى ديپلوممەن ماراپاتتالعان بولسا، حالىقارالىق «الماتى -  تاۋەلسىزدىگىمنىڭ التىن بەسىگى» اتتى ونەر فەستيۆالى كورمەسىندە «زۋقا باتىر» اتالىمىن يەلەنگەن.

بۋىرقانعان بوياۋلارعا قىلقالامىن مالىپ، قوڭىر بەلدەرمەن بوياۋ ۇندەستىگىن جاراستىرا بىلگەن سۋرەتشىنىڭ تۋىندىلارىنان بار عۇمىرى اتتىڭ ۇستىندە وتكەن كوشپەندى اتا-بابالارىمىزدىڭ، ۇلى دالانىڭ رۋحىن سەزەسىز. كەيدە بار قۇپياسى قاراپايىمدىلىعىنا جاسىرىنىپ جاتاتىن قوناعۋار قوڭىر تىرشىلىگىنىڭ نەبىر سىرلى عاجايىبى دا ءنۇسىپحان ۇلىنىڭ قولتاڭباسىنان مەنمۇندالاپ تۇرادى. بەينەلەۋ ونەرىنىڭ پەيزاج، ناتيۋرمورت جانرلارىنداعى كومپوزيتسياسى ورنىقتى، بوياۋىن مەيلىنشە تۇسكە باي ەتىپ سالعان سۋرەتتەرى كوپتىڭ كوزىن ارباپ، كوڭىلىن جاۋلايدى.

سوڭعى كەزدەرى كاريكاتۋرا، گرافيكالىق تاسىلمەن ورنەكتەلگەن جۇمىستارى كىتاپتىڭ قىستىرما سۋرەت نۇسقالارىنا نەگىزدەلۋدە. قادىرسۇلتان بەينەلەۋ ونەرىن ناعىز بەكزات ونەر دەپ باعالايدى. شىن شەبەردىڭ قولىنان شىققان سۋرەتتىڭ كوز تويدىرار كوركەمدىگى كورگەن جاننىڭ كوڭىل سارايىن اشىپ، جان الەمىنىڭ جاعالاۋىنان جايلى سامال ەستىرەدى.

ورنەكپەن دە ونەگەلى وي ايتقان، ساليحالى كوشىن سان ءتۇرلى ويۋمەن ساندەپ ساحارانى سالتاناتقا بولەگەن اتا-بابالارىمىزدىڭ اسەمدىككە دەگەن تۇسىنىك، تۇيسىگى بولەك-اق، دەپ شابىتتانادى. قازىر ءومىر اعىسى وزگەشە بولعانىمەن سول ەلدىڭ بۇگىنگى جاس ۇرپاقتارى ەتنوكوركەمدىك ارقىلى ەستەتيكالىق تاربيە بەرۋدى باستى ماقساتىم سانايمىن، - دەيدى قىلقالام يەسى. ول قازىر الماتى وبلىسى، الاكول اۋدانى، ىنتالى اۋىلىندا تۇرادى.

اۋىلدىق اكىمشىلىكتە جاستار ءىسى جونىندەگى نۇسقاۋشى مامان. سونداي-اق، ىنتالى ورتا مەكتەبىندە قوسىمشا سۋرەت پاندەرىنەن ساباق بەرىپ، ءوز شاكىرتتەرىن تاربيەلەپ ءجۇر. ايتپاقشى، قادىرسۇلتاننىڭ اقىندىق قىرى جانە بار. كەيدە وبلىس، اۋدانداردا وتەتىن مادەني ءىس-شارالارعا ءار اۋىلدان ونەرپازدار قاتىسۋى كەرەك بولىپ قالاتىن جاعدايلار بولىپ جاتادى عوي، سوندا ىنتالى اۋىلىنىڭ ولەڭ بايگەسىنە دە، سۋرەت بايگەسىنە دە قاتار قوساتىن جۇيرىكتەرى دە وسى قادىرسۇلتان. قوس قالامى قۋاتتى بولعاي!

ۇلاربەك نۇرعالىم ۇلى، «ەگەمەن قازاقستان»

 قادىرسۇلتان ءنۇسىپحان ۇلىنىڭ سۋرەتتەرى