قىزىلوردادا تۇڭعىش رەت سپورتتىق بيدەن تۋرنير ءوتتى
اتالمىش شاراعا تاشكەنت، بايقوڭىر، اقوبە، شىمكەنت جانە قىزىلوردا قالالارىنان 400 دەن استام قاتىسۋشى جينالدى، دەپ حابارلايدى، - دەپ حابارلادى قازاقپارات ءتىلشىسى وبلىستىق ازاماتتىق اليانسى قاۋىمداستىعىنا سىلتەمە جاساپ.
تۋرنيردىڭ ۇيىمداستىرۋشىسى «وردا» كلۋبى شارانى وبلىستىق دەنە شىنىقتىرۋ جانە سپورت باسقارماسىنىڭ قولداۋىمەن جۇزەگە اسىردى.
«ءبىزدىڭ فەدەراتسيا وسىدان 2 جىل بۇرىن قۇرىلدى»، - دەيدى سپورتتىق بيدەن كلۋب جەتەكشىسى ءارى وبلىستىق فەدەراتسيا پرەزيدەنتى اناتولي سوي. «وردا» كلۋبى دا وسى كەزدە پايدا بولدى. قازىر بىزدە 50 گە جۋىق ادام تۇراقتى اينالىسۋدا. رەسپۋبليكالىق، حالىقارالىق تۋرنيرلەردەن جۇلدەمەن ورالدىق. وسىعان دەيىن قازاقستان مەن وزبەكستاندا بولعان جارىستارعا قاتىسساق، الدا ورىنبوردا وتەتىن سايىسقا شاقىرۋ الىپ وتىرمىز».
سپورتتىڭ بۇل ءتۇرى قىزىلوردادا ەندى دامىپ كەلەدى. سوندىقتان دا كلۋب باسشىلىعى قازىر ونى ناسيحاتتاۋعا بارىن سالۋدا. وسى ماقساتتا ايدىڭ اياعىندا كلۋب قۇرامىنا بالالاردى قابىلداۋ باستالادى. سونىمەن قاتار، سپورتتىق بيمەن ونشاقتى جىلدان بەرى اينالىسىپ كەلە جاتقان اناتولي سوي مۇگەدەكتەر اراسىندا دا بۇل باعىتتى دامىتۋدى كوزدەپ وتىر.
ونىڭ بۇل باستاماسى وبلىستىق دەنە شىنىقتىرۋ جانە سپورت باسقارماسى مەن پاراوليمپيادالىق كوميتەت تاراپىنان قولداۋ تاۋىپ، تۋرنيردە ارباعا تاڭىلعان جاندار دا ونەر كورسەتتى.
«ايىرىقشا ءبي» اتاۋىن يەلەنگەن جوبانىڭ جۇزەگە اسۋىنا « قىزىلوردا ەرىكتىلەرى» قاۋىمداستىعى مۇشەلەرى دە ۇلەس قوستى. «ايرىقشا ءبي» جوباسى بويىنشا ونەر كورسەتكەن بيشىلەرگە مەتسەناتتار ازىرلەگەن سىيلىقتار تابىس ەتىلدى.
تۋرنيردى ۇيىمداستىرۋشىلارعا ق ر ءبي سپورتى فەدەراتسياسىنان كەلگەن باس تورەشى يۋري زايدەنترۋمف جىلى لەبىزىن جەتكىزدى.
«بۇل قىزىلورداعا العاش كەلۋىم»، - دەيدى ول. «ءبىراق، جاقىندا اشىلعان كلۋبتىڭ مىنا تالابىنا قاراعاندا سىر وڭىرىنە ءالى دە تالاي جولىمىز تۇسەتىن سياقتى. ارينە، مەن بۇعان قۋانىشتىمىن. بۇگىنگى تۋرنيرگە قاتىسقانداردىڭ اراسىنان الدا تالاي جارىستان وزىپ شىعار تالانتتىلاردى بايقادىم».
