مەسسيدەن اۋماي قالعان يراندىق ەلدى تاڭداندىردى

استانا. قازاقپارات - ادامعا ادامدى ۇقساتىپ جاتامىز. كوبىنە تۇرىنە قاراي ۇقساتساق، كەيبىرىنىڭ مىنەز- قۇلىعى مەن قىلىقتارى ۇقسايدى ەكەن دەپ ايتامىز.

ال جاقىندا ايگىلى فۋتبولشى مەسسيدەن اۋماي قالعان يراندىق ەلدى تاڭداندىردى. 29 جاستاعى تەگەران تۇرعىنى ريزا پەرەستەس ليونەل مەسسيدەن اۋمايدى. ءوزى دە ارگەنتينالىق فۋتبولشىعا ەلىكتەيدى ەكەن. ءبىراق ەشقانداي پلاستيكالىق وتا جاساتپاعان. تەك سۇيىكتى فۋتبولشىسىنىڭ يميدجىن (شاش بوياۋ، شاش قيۋ، ساقال ءوسىرۋ، ت. ب. ) ءجىتى باقىلاۋدا ۇستايدى.

 ريزا پەرەستەسكە تۋىسقاندارى مەن دوستارى الدەقاشان مەسسي دەپ ات قويعان. كوشەدەن كورگەندەر تاڭدانىستارىن جاسىرا المايدى ەكەن. ال اۋەجايدا جۇرت قولتاڭبا سۇراپ، كەزەككە تۇرعان ساتتەر دە كوپ بولىپتى. ريزا پەرەستەستىڭ مەسسيدەن ايىرماشىلىعى - ارتىق سالماعىندا. ول جاقىن كۇندەرى ىشىندەگى ارتىق مايىنان ارىلىپ، سالماق تاستاۋدى جوسپارلاپ ءجۇر ەكەن. ايتا كەتەيىك، قازاقستاندا دا مەسسيگە ۇقسايتىن ادام بار ەكەنى وتكەن جىلى اقپارات قۇرالدارىندا جازىلعان. قاراعاندىنىڭ كيريلل وۆچيننيكوۆ ەسىمدى تۇرعىنىن ارگەنتينالىق فۋتبولشىعا ۇقساتاتىندار كوپ. ءبىراق ول فۋتبولعا قىزىقپايدى. فۋتبولشىعا ەلىكتەمەيدى دە ەكەن.

 

Massaget.kz