مۋزەيدە وتەتىن ساباقتار ءۇشىن اتا- انالار اقشا تولەمەيدى - ساعاديەۆ

استانا. قازاقپارات - ۇكىمەتتىڭ بۇگىنگى وتىرىسىندا ق ر ءبىلىم جانە عىلىم ءمينيسترى ەرلان ساعاديەۆ جاڭا وقۋ جىلىنان باستاپ ءبىرقاتار پاندەر مۋزەيلەردە وتكىزىلەتىنىن مالىمدەگەن بولاتىن.

وسى ورايدا ول «جەرگىلىكتى اكىمدىكتەر مۋزەيلەرگە بارۋ اقىسىن تولەۋ مەحانيزمىن ازىرلەۋى كەرەك» دەگەندى ايتىپ قالدى، دەپ حابارلايدى قازاقپارات ءتىلشىسى.

 «ەندى، مۋزەيلەردە ساباقتار وتسە، مەكتەپ وقۋشىلارىنىڭ كوپتەپ كەلەتىنى بەلگىلى. ارينە، مۋزەيلەردىڭ اقشاسى بولماسا، وزدەرىنە قيىن بولادى. ويتكەنى بارلىق بالالاردى قابىلداۋ قاجەت. وسىعان بايلانىستى تولەۋ مەحانيزمىن ەنگىزۋ كەرەك دەپ وتىرمىز. اتا- انالار ەشقانداي اقشا تولەمەيدى. مەكتەپ ءوزى ۇيىمداستىرادى. سوندىقتان (مۋزەيدەگى ساباقتار ءۇشىن - اۆت.) تەك قانا مەكتەپ تولەۋى ءتيىس. ال مەكتەپكە اكىمشىلىك اقشاسىن بەرۋى كەرەك. بالالارعا ەشقانداي سالماق تۇسپەيدى»، - دەدى ساعاديەۆ قازاقپارات تىلشىسىنە بەرگەن سۇحباتىندا.

 ايتا كەتەيىك، بيىلدان باستاپ گەوگرافيا، دۇنيەتانۋ جانە قازاقستان تاريحى ساباقتارىن كەمىندە ەكى ساعاتتان مۋزەيلەردە وتكىزۋ جوسپارلانىپ وتىر.

 «ارينە، بۇل ءىس- شارالار تەك قانا جاعدايى بار جەرلەردە وتكىزىلەدى. دەگەنمەن، قازاقستاننىڭ مۋزەيلەرى كۇزگە دەيىن دايىن بولۋى كەرەك. سونىڭ ىشىندە وقۋشىلار وتىراتىن ورىنداردى دايىنداپ، مۋزەيلەردى قاجەتتى تەحنيكالىق قۇرالدار - پروەكتورلار مەن ينتەراكتيۆتى تاقتالارمەن قامتاماسىز ەتۋ كەرەك. جوعارى وقۋ ورىندارىنا قاراستى زەرتتەۋ ينستيتۋتتارىنىڭ مۋزەيلەرىن ءبىز ءوزىمىز دايىندايمىز. ءبىرقاتار وبلىس اكىمدەرىمەن وسى ماسەلە تالقىلاندى. بۇل جۇمىستى وتكىزۋ ءۇشىن جەرگىلىكتى اكىمدىكتەر مۋزەيلەرگە بارۋ اقىسىن تولەۋ مەحانيزمىن ازىرلەۋى ءتيىس»، - دەپ اتاپ كورسەتتى مينيستر.

 اۆتور: ارمان اسقاروۆ