التىن ادامدى الەمدىك شەديەۆرگە اينالدىرۋ قاجەت - ارىستانبەك مۇحامەدي ۇلى

استانا. قازاقپارات - ۇكىمەتتىڭ بۇگىنگى وتىرىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ەسىك قورعانىندا تابىلعان التىن ادامدى الەمگە كەڭىنەن ناسيحاتتاپ، رەمبرانت پەن لەوناردو دا ۆينچيدىڭ تۋىندىلارى دەڭگەيىنە دەيىن كوتەرۋدى ۇسىندى. وسىنىڭ ارقاسىندا قازاقستانعا تۋريستەردى كوپتەپ تارتۋعا بولادى، دەپ حابارلايدى قازاقپارات ءتىلشىسى.

«الەم بويىنشا مۋزەيلەرگە تۋريستەردىڭ كوپتەپ باراتىنى بەلگىلى. ءبارىمىز جاقسى بىلەمىز، ونداي مۋزەيلەردىڭ اربىرەۋىندە ءبىر شەديەۆر بار. ماسەلەن، لۋۆرعا باراتىنداردىڭ 70-80 پايىزى لەاناردو دا ۆيچنيدىڭ «دجوكونداسىن» كورۋگە اسىعادى. ال ەرميتاجدا رەمراندتىڭ «اداسقان ۇلدىڭ ورالۋى» اتتى تۋىندىسىن كورگىسى كەلەدى. ارينە، ءوزىمىزدىڭ ۇلتتىق مۋزەيىمىزگە دەگەن تۋرا سونداي قىزىعۋشىلىقتى تۋعىزۋ ءۇشىن قىمبات ءبىر شەديەۆردى ساتىپ الۋ قاجەت. ال سوتبيس اۋكسيونىندا ول شەديەۆرلەردىڭ تومەنگى باعاسى 100 ميلليون دوللاردان باستالادى»، - دەيدى مۇحامەدي ۇلى.

وسى ورايدا مينيستر التىن ادام سياقتى قازاقستاننىڭ وزىندىك شەديەۆرىن كەڭىنەن ناسيحاتتاۋ قاجەت دەپ سانايدى. ول ءۇشىن الەمدىك اتى بار مۋزەيلەردە كوشپەلى كورمەلەردى ۇيىمداستىرىپ، تانىمال ارنالاردان التىن ادام تۋرالى دەرەكتى جانە انيماتسيالىق فيلمدەردى كورسەتۋگە بولادى.

«ءالى ەسىمدە، رەسەيدىڭ مەملەكەتتىك ەرميتاجىنا التىن ادامدى العاش رەت اپارىپ قويعاندا ءبىراز قيىنشىلىقتار بولدى. سول كەزدە ءبىز پەتروۆسكي مىرزادان ەكپوزيتسيانى 20 كۇنگە دەيىن ۇزارتۋدى سۇراعانبىز. الايدا ەكى اپتادان كەيىن ول ءوزى قوڭىراۋ شالىپ، التىن ادامدى ەكى ايعا دەيىن قالدىرۋدى سۇرادى. بۇل دەگەنىمىز، جەرگىلىكتى حالىقتىڭ تاراپىنان ۇلكەن قىزىعۋشىلىق بولدى»، - دەپ اتاپ كورسەتتى ارىستانبەك مۇحامەدي ۇلى.

اۆتور: ارمان اسقاروۆ