بەكبولات تىلەۋحان: «شيقىلداعان تىلدەگى» مۋلتفيلمگە تىيىم سالۋ كەرەك
«تەلەديداردان 24 ساعات بويى «شيقىلداعان تىلدە» مۋلتفيلم كورسەتەدى. بالالارىمىزدىڭ ءتىلى وسى قۇلاققا جاعىمسىز تىلدە «شيقىلداپ» شىعىپ كەلە جاتىر. بۇل نە قازاقتىڭ، نە ورىستىڭ ءتىلى ەمەس، ياعني مۋلتفيلمنىڭ ءتىلى. جالپى، وسى باعىتتا ءتيىستى شەكتەۋلەر بولا ما؟ » ، - دەدى دەپۋتات.
سونىمەن قاتار بەرىك دۇيسەنبينوۆ بالالاردىڭ دامۋىنا زيان كەلتىرەتىن كومپيۋتەرلىك ويىندارعا تىيىم سالۋ كەرەكتىگىن اتاپ ءوتتى.
«بۇل ويىنداردىڭ فيلوسوفياسىنىڭ ءوزى بالادان بولەك، ەرەسەك ادامدى شوشىتادى» ، - دەدى دەپۋتات.
ايتا كەتەيىك، ماجىلىستە «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالالاردىڭ دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ ماسەلەلەرى بويىنشا وزگەرتۋ مەن تولىقتىرۋلار ەنگىزۋ تۋرالى» زاڭ جوبالارى تانىستىرىلدى.
«وسى زاڭ جوبالارىنا پارلامەنتتىڭ ءبىر توپ دەپۋتاتى باستاماشىلىق ەتتى. زاڭنامانىڭ ديدارى وزگەردى، دامۋ قارقىنى الاپات. اقپاراتتىڭ تاسقىنى كەزەڭىندە ونىڭ زاردابىنان بالالاردى، جاس ۇرپاقتى قورعاۋدىڭ ماڭىزدىلىعى كۇن تارتىبىنە شىعىپ وتىر» ، - دەدى ءماجىلىس دەپۋتاتى بەكبولات تىلەۋحان تانىستىرىلىم بارىسىندا.
«زاڭ جوباسىنىڭ مىندەتى بالالاردى فيزيكالىق جانە پسيحيكالىق دەنساۋلىعىنا، يماندىلىق، رۋحاني، پسيحيكالىق، فيزيكالىق جانە الەۋمەتتىك جاعىنان دامۋىنا زاردابىن تيگىزەتىن اقپاراتتان، ونىڭ ىشىندە زورلىق- زومبىلىق پەن قاتىگەزدىكتى، پورنوگرافيانى، قوعامعا جات ءارى قۇقىق بۇزۋشىلىق ارەكەتتى ناسيحاتتايتىن باسپا، دىبىس پەن بەينە ونىمدەرىن، ەلەكتروندىق جانە كومپيۋتەرلىك ويىنداردى تاراتۋدان قورعاۋدىڭ ۇيىمداستىرۋشىلىق- قۇقىقتىق تەتىكتەرى مەن زاڭنامالىق كەپىلدىكتەرىن ەنگىزۋ بولىپ تابىلادى. وسى ورايدا الەمنىڭ جەتەكشى ەلدەرىنىڭ تاجىريبەسى ەسكەرىلىپ وتىر» ، - دەپ ناقتىلادى ب. تىلەۋحان.
اۆتور: رۋسلان عابباسوۆ
