قازاقستاندا بالالار زياندى كومپيۋتەرلىك ويىنداردان قورعالادى
«بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالالاردىڭ دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ ماسەلەلەرى بويىنشا وزگەرتۋ مەن تولىقتىرۋلار ەنگىزۋ تۋرالى» زاڭ جوبالارىنىڭ تانىستىرىلىمىن وتكىزىپ جاتىرمىز.
وسى زاڭ جوبالارىنا پارلامەنتتىڭ ءبىر توپ دەپۋتاتى باستاماشىلىق ەتتى. زاڭنامانىڭ ديدارى وزگەردى، دامۋ قارقىنى الاپات. اقپاراتتىڭ تاسقىنى كەزەڭىندە ونىڭ زاردابىنان بالالاردى، جاس ۇرپاقتى قورعاۋدىڭ ماڭىزدىلىعى كۇن تارتىبىنە شىعىپ وتىر»، - دەدى ءماجىلىس دەپۋتاتى بەكبولات تىلەۋحان تانىستىرىلىم بارىسىندا.
ونىڭ سوزىنە قاراعاندا، زاڭ جوباسىنىڭ مەملەكەتتىڭ «بالانى قالىپتى دامۋىنا زاردابىن تيگىزەتىن اقپارات پەن ماتەريالداردان قورعاۋدىڭ ءتيىستى قاعيدالارىن» ازىرلەۋدى قامتاماسىز ەتۋ مىندەتتەرىن ساقتاۋىنا ىقپال ەتۋگە، سونداي-اق بالانىڭ ءوزىنىڭ قۇقىقتارىنا، اتاپ ايتقاندا «اقپارات پەن كەز كەلگەن تۇردەگى يدەيانى ىزدەۋ، الۋ، بەرۋ بوستاندىعىنا» قاجەتتى شەكتەۋلەردى بەلگىلەۋگە ارنالعان.
«زاڭ جوباسىنىڭ مىندەتى بالالاردى فيزيكالىق جانە پسيحيكالىق دەنساۋلىعىنا، يماندىلىق، رۋحاني، پسيحيكالىق، فيزيكالىق جانە الەۋمەتتىك جاعىنان دامۋىنا زاردابىن تيگىزەتىن اقپاراتتان، ونىڭ ىشىندە زورلىق-زومبىلىق پەن قاتىگەزدىكتى، پورنوگرافيانى، قوعامعا جات ءارى قۇقىق بۇزۋشىلىق ارەكەتتى ناسيحاتتايتىن باسپا، دىبىس پەن بەينە ونىمدەرىن، ەلەكتروندىق جانە كومپيۋتەرلىك ويىنداردى تاراتۋدان قورعاۋدىڭ ۇيىمداستىرۋشىلىق- قۇقىقتىق تەتىكتەرى مەن زاڭنامالىق كەپىلدىكتەرىن ەنگىزۋ بولىپ تابىلادى. وسى ورايدا الەمنىڭ جەتەكشى ەلدەرىنىڭ تاجىريبەسى ەسكەرىلىپ وتىر»، - دەپ ناقتىلادى ب. تىلەۋحان.
اتاپ ايتقاندا، ىلەسپە زاڭنىڭ جوباسىندا ق ر اكىمشىلىك قۇقىق بۇزۋشىلىق تۋرالى كودەكسى مەن «قازاقستان رەسپۋبليكاسىنداعى بالانىڭ قۇقىقتارى تۋرالى»، «ءبىلىم تۋرالى» جانە «رۇقساتتار جانە حابارلامالار تۋرالى» قازاقستان زاڭدارىنا وزگەرىستەر مەن تولىقتىرۋلار ەنگىزۋ كوزدەلگەن. زاڭ جوباسىندا بالالارعا تىيىم سالىنعان اقپاراتتىق ءونىمدى كامەلەتكە تولماعاندارعا تاراتقانى، بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى زاڭنامانى بۇزعانى ءۇشىن اكىمشىلىك جاۋاپتىلىقتى بەلگىلەۋ كوزدەلەدى.
اۆتور: رۋسلان عابباسوۆ
