قازاقستاندا زاڭ جۇزىندە ءدارى-دارمەك باعالارىنا شەكتەۋ قويىلاتىن بولادى
بۇل تۋرالى بۇگىن ق ر پارلامەنتى سەناتىندا قازاقستان رەسپۋبليكاسى دەنساۋلىق ساقتاۋ مينيسترلىگىنىڭ جاۋاپتى حاتشىسى بولات توكەجانوۆ ءمالىم ەتتى، دەپ حابارلايدى قازاقپارات. «قازاقستان پرەزيدەنتى نۇرسۇلتان نازاربايەۆ ۇسىنعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا دەنساۋلىق ساقتاۋ مينيسترلىگىنە ءدارى- دارمەك باعالارىن رەتتەۋدىڭ جاڭا ادىستەرىنە كوشۋدى تاپسىرعان بولاتىن.
وسىعان بايلانىستى دەنساۋلىق ساقتاۋ مينيسترلىگى «ءدارى- دارمەك قۇرالدارىنىڭ باعالارىن رەتتەۋ تۋرال» زاڭ جوباسىنىڭ تۇجىرىمداماسىن جاساقتادى. بارلىق دارىلەردىڭ قۇنىن رەتتەۋگە باعىتتالعان زاڭ جوباسىن ءبىز بيىل تامىز ايىندا پارلامەنتكە ەنگىزەمىز. قازىر دەنساۋلىق ساقتاۋ مينيسترلىگى تەك كەپىلدەندىرىلگەن تەگىن مەديتسينالىق قىزمەت كورسەتۋ باعدارلاماسى اياسىندا قولدانىلاتىن دارىلەردىڭ باعاسىن عانا بەكىتەتىن بولسا، زاڭ جوباسى ەنگىزىلگەن جاعدايدا باعانى رەتتەۋ بارلىق ءدارى- دارمەكتەرگە تارالاتىن بولادى. سونىمەن قاتار باعا رەتتەۋدىڭ جاڭا شەشىمدەرى جاساقتالىپ جاتىر»، - دەپ اتاپ ءوتتى جاۋاپتى حاتشى.
ايتا كەتۋ كەرەك، قازاقستاندا بۇگىندە ءدارى-دارمەكتەردىڭ ۇلتتىق فورمۋليارى جاساقتالدى. بۇنىڭ الدىندا، ق ر دەنساۋلىق ساقتاۋ مينيسترلىگىنىڭ فارماتسيا كوميتەتى قازاقپاراتتىڭ رەسمي ساۋالىنا وراي ق ر پارلامەنتى ءماجىلىسىنىڭ دەپۋتاتى زاۋرەش امانجولوۆانىڭ ءدارىحانالارداعى ءدارى باعاسىنىڭ قىمباتتىعىنا قاتىستى سىنىنا جاۋاپ بەرگەن بولاتىن. وندا ق ر دەنساۋلىق ساقتاۋ مينيسترلىگى بۇكىل دارىلەردىڭ باعاسىن رەتتەۋ ءۇشىن فارماتسەۆتيكا قوعامداستىعىنىڭ وكىلدەرىمەن بىرگە بارلىق دارىلىك زاتتاردىڭ شەكتى باعاسىن قالىپتاستىرۋ ادىستەمەسىن تالقىلاۋ جۇمىسىن جۇرگىزىپ جاتقاندىعى تۋرالى حابارلانعان ەدى.
اۆتور: جاسۇلان جولدىبايەۆ
