ۇكىمەت باسشىسى: ءدىني تاربيە بەرۋدە ءار ادامنىڭ جۇرەگىنە جەتە ءبىلۋ قاجەت

استانا. قازاقپارات - «ءدىني تاربيە بەرۋدە ءار ادامنىڭ جۇرەگىنە دەيىن جەتۋ قاجەت».

بۇگىن ق ر ۇكىمەتىنىڭ سەلەكتورلىق رەجىمدەگى وتىرىسىندا ءدىن سالاسىنداعى مەملەكەتتىك ساياساتتىڭ 2017-2020 -جىلدارعا ارنالعان تۇجىرىمداماسىن تالقىلاۋ بارىسىندا ق ر پرەمەر-ءمينيسترى باقىتجان ساعىنتايەۆ وسىلاي ايتتى، دەپ حابارلايدى قازاقپارات.

پرەمەر-ءمينيستردىڭ ايتۋىنشا، بۇل تۇجىرىمداما جالپى قوعام مەن قوعامدىق سانانىڭ تۇراقتى جانە ۇيلەسىمدى دامۋىنا، ەۆوليۋتسيالىق جاڭعىرۋىنا ىقپال ەتۋى كەرەك.

«مەملەكەت باسشىسى قازاقستان مۇسىلماندارى ءدىني باسقارماسىنىڭ وكىلدەرىمەن كەزدەسۋ بارىسىندا جاس بۋىننىڭ ءدىني ساۋاتىنىڭ تومەندىگىنە ايرىقشا نازار اۋدارعان بولاتىن. سوندىقتان ءدىني سالادا دۇرىس تاربيەلىك جانە اعارتۋشىلىق جۇمىستار جۇرگىزۋدە كۇش- جىگەردى شوعىرلاندىرۋىمىز، بارلىق تۇجىرىمدامالاردىڭ بەيبىت جۇزەگە اسىرىلۋىنا سەپتەسىپ، كەلىسىمدى نىعايتۋعا جاردەمدەسۋىمىز قاجەت. حالىق دانالىعى: «اللانى ءوز جۇرەكتەرىڭىزدەن ىزدەڭىزدەر. ونى ودان باسقا ەش جەردەن تابا المايسىزدار»، دەيدى. سوندىقتان سىزدەر مەن ءبىزدىڭ ماقساتىمىز - ءاربىر ادامنىڭ جۇرەگىنە دەيىن جەتۋ»، - دەپ اتاپ ءوتتى ۇكىمەت باسشىسى.

ايتا كەتەيىك، ق ر ۇكىمەتىنىڭ سەلەكتورلىق رەجىمدەگى وتىرىسىندا ءدىن سالاسىنداعى مەملەكەتتىك ساياسات تۇجىرىمداماسى تالقىلانعان بولاتىن.

اۆتور: مارلان جيەمباي