ۇكىمەت ءدىن سالاسىنداعى مەملەكەتتىك ساياسات تۇجىرىمداماسىن تالقىلادى

استانا. قازاقپارات - بۇگىن ق ر ۇكىمەتىنىڭ سەلەكتورلىق رەجىمدەگى وتىرىسىندا ءدىن سالاسىنداعى مەملەكەتتىك ساياسات تۇجىرىمداماسى تالقىلاندى، دەپ حابارلايدى قازاقپارات.

اتالعان ماسەلە بويىنشا بايانداما جاساعان ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆتىڭ ايتۋىنشا، قازاقستان حالقى ۇلتتىق داستۇرگە، قازىرگى زامانعى اقيقاتقا نەگىزدەلگەن جانە ءدىني قاعيدالاردىڭ ىشىنەن مەيىرىمدىلىكتى ۇستاناتىن، جات پىكىرلەر مەن كەڭەستەرگە ەلىكتەمەيتىن مەملەكەت رەتىندە مەملەكەت پەن ءدىننىڭ قارىم- قاتىناسىندا وزىندىك مودەل قالىپتاستىرۋعا قۇقىلى ەكەندىگىن اتاپ ءوتتى.

«سىزدەردىڭ نازارلارىڭىزعا ۇسىنىلىپ وتىرعان ءدىن سالاسىنداعى مەملەكەتتىك ساياساتتىڭ 2017-2020 جىلدارعا ارنالعان تۇجىرىمداماسى وسى مودەلدىڭ نەگىزى بولىپ تابىلادى. وسى تۇجىرىمدامامەن جۇمىس ىستەۋ بارىسىندا پرەزيدەنتتىڭ «مەملەكەتتىڭ زايىرلىلىق قاعيداتىن نىعايتۋ، كەز كەلگەن ءدىني راديكاليزمدى بولدىرماۋ» نۇسقاۋلارىن باسشىلىققا الدىق. تۇجىرىمدامانىڭ ماقساتى ءدىني سالانى رەتتەۋ بويىنشا 2020 -جىلعا دەيىنگى عىلىمي تەوريالىق نەگىزدەردى ايقىنداۋ، ەلدەگى ءدىن سالاسىن رەتتەۋ بويىنشا زاڭنامالىق باسقارۋشىلىق، الەۋمەتتىك- ەكونوميكالىق شارالاردى انىقتاۋ بولىپ تابىلادى. ونى ىسكە اسىرۋ قوعامدا جانە جالپى رۋحاني سالادا تۇراقتى ءارى ۇيلەسىمدى دامۋدى، جاڭعىرۋدى قامتاماسىز ەتەدى»، - دەدى مينيستر.

سونىمەن قاتار ول ەلىمىزدىڭ بۇدان كەيىنگى دامۋ بولاشاعى ءدىن سالاسىنداعى مەملەكەتتىك ساياساتتىڭ پارمەندىلىگىمەن تىعىز بايلانىستى ەكەندىگىن باسا ايتتى. تۇجىرىمداما جوباسىن تالقىلاۋ بارىسىندا ءماجىلىس دەپۋتاتى جانات جاراسوۆ اتالعان قۇجاتتىڭ نەگىزگى يدەيالارىنا قولداۋ كورسەتىپ، باستى ەرەجەلەرىنىڭ پارمەندىلىگىن ارتتىرا ءتۇسۋ ءۇشىن قوعام مەن مەملەكەت دامۋىنىڭ ودان ارى ءبىرىزدى دامۋىن قامتاماسىز ەتۋ ماقساتىندا وسى سالاداعى زاڭنامالاردى جەتىلدىرۋ قاجەتتىگىن اتاپ ءوتتى.

اۆتور: مارلان جيەمباي