قانات يسلامدى قاي ناتيجەسى ءۇشىن ەلگە ۇلگى ەتىپ ءجۇرمىز؟

استانا. قازاقپارات - ءبىرازدان بەرى جازعىمىز كەپ جازا الماي، ايتقىمىز كەپ ايتا الماي جۇرگەن ماسەلە ەدى.

قۋ تىرشىلىكتەن قولىمىز بوساماي، بوساي قالسا قالامىمىزدىڭ «سياسى» بولماي ءبىراز توسىلىپ جۇردىك. سودان، ويدا جۇرگەن دۇنيەنى قاعازعا ءتۇسىرۋدىڭ بۇگىن رەتى كەلگەن ەكەن.

سوڭعى ۋاقىتتا ەلىمىزدە كاسىپقوي بوكس عارىشتاپ دامىپ جاتقانى جاسىرىن ەمەس.

قازاق كاسىپقوي بوكسشىلارىنىڭ ءتىزىمىن ايتقاندا نەمەسە جانكۇيەرلەردەن كىمدەردى تانيسىڭ دەپ سۇراعاندا گەنناديي گولوۆكيننەن كەيىن قانات يسلامنىڭ ەسىمى اتالىپ ءجۇر. كاسىپقوي رينگتە ازىرشە جەتكەن جەتىستىگى، تىندىرعان ءىسى بولماسا دا، ايتەۋىر قازاق جانكۇيەرلەرى اراسىندا اسا تانىمال.

ال، جۋىردا عانا الەم چەمپيونى اتانعان جانات جاقيانوۆتى، جالپاق تىلمەن ايتقاندا، الەمنىڭ ۆيتسە-چەمپيونى بەيبىت شۇمەنوۆتى قازاق جانكۇيەرلەر تاني بەرمەيدى. ويتكەنى، ولار ەلىم- جەرىم دەپ تۋرا ماعىناسىندا جىلاعان جوق، شەتتەن شەكارا اسىپ كەلگەن جوق. الەمگە قازاقتى بوكسى ارقىلى تانىتىپ جۇرگەن جانات پەن بەيبىتتى ەمەس، قاناتتى جاس ۇرپاققا باتىر، تۇلعا ەتىپ تە كورسەتىپ ءجۇرمىز. ءيا، جاستارعا ۇلگى بوپ جۇرگەنىنە قۋانىشتىمىز. ءبىراق، وسكەلەڭ ۇرپاققا قانات يسلامدى قاي جەتىستىگى ءۇشىن، قانداي ەرلىگى ءۇشىن ۇلگى (باتىر) قىلىپ ءجۇرمىز. وسىنى ويلادىق پا؟ (ويلاپ كورىڭىز، ماقالا سوڭىندا سىزدەن مىندەتتى تۇردە سۇرايتىن بولامىز).

 

جانات جاقيانوۆ، قانات يسلام

بۇيىرسا، قانات الداعى ۋاقىتتا راسىمەن قاناتىن كەڭ سەرپىپ، الەمدى مويىنداتقانىن، شىن مانىندە جاستارعا ۇلگى بولعانىن قالايمىز. ءبىراق، ءدال قازىر ەمەس. ءبىردى ايتىپ، ۇشكە وتپەي تۇرعاندا كىرىسپەمىزدى وسى جەردەن توقتاتا تۇرىپ، ءسىز ەمەس، سىزدەر ۇلگى تۇتىپ جۇرگەن قانات يسلامنىڭ كاسىپقوي بوكستاعى (جەكە ومىرىندەگى ەمەس) نەگىزگى قاتەلىكتەرىن رەت- رەتىمەن بايانداعاندى ءجون كورىپ وتىرمىز.

كاسىپقوي بوكسقا كەش كەلگەن تالانت

ناعىز تالانتتى بوكسشىلاردىڭ ءبىرى - قانات ەدى. رينگتەگى قيمىلىن ايتپاعاندا، سوققىسىنىڭ ءوزى تالاي بوكسشىنى قايمىقتىراتىن. قاناتتىڭ كاسىپقوي بوكسقا اۋىسقانداعى باستى قاتەلىگىنىڭ ءبىرى الەمدىك دەڭگەيگە جەتكىزەتىن پروموۋتەرمەن كەلىسىم شارت جاساماعانى مەن دۇرىس باپكەر تاڭداماعانى. ارينە، بۇل جەردە قانات يسلامنىڭ كاسىپقوي بوكسقا اۋىسقىسى كەلگەنى جانە ونى سول ۋاقىتتا «استانا ارلاندارىن» باپتاعان نەلسون لوپەستان باسقا وعان ۇسىنىس بىلدىرگەن ەشكىم بولمادى. سوندىقتان، ول لوپەسپەن جۇمىس ىستەۋگە كەلىستى.

«نەلسون لوپەس - كولۋمبيالىق پروموۋتەر. كاسىپقوي بوكستا ەڭ ۇلكەن ءتورت بوكس كەشىن وتكىزگەن. جانە بىردە- بىرەۋى الەم چەمپيونى اتاعى ءۇشىن وتپەگەن. بىلايشا ايتقاندا، اۋدانارالىق تۋرنير ۇيىمداستىرعانمەن بىردەي. وسىدان-اق، نەلسون مىرزانىڭ بوكس الەمىندەگى ابرويىن ويلاي بەرىڭىز».

دەگەنمەن، ءار پروموۋتەردىڭ، مەنەدجەردىڭ ايلىق، جارتى جىلدىق جانە جىلدىق جوسپارى بولادى عوي. مىسالى، پالەن جىلدا مىنا بەلبەۋگە، تۇگلەن جىلى الەم چەمپيونى اتاعى ءۇشىن جۇدىرىقتاساسىڭ دەگەن سياقتى. قانات نەلسون كوكەسىمەن جاساعان كەلىسىم شارتىندا نە جازىلعانى، قانداي كەلىسىم بولعانىن بىلمەيمىز، ءبىراق بەس جىلدان بەرى ءالى چەمپيوندىق اتاق ءۇشىن جەكپە-جەك وتكىزبەگەنى ءبىزدى قىنجىلتادى. بەس جىلدا 23 رەت شارشى الاڭعا شىققان بوكسشىنىڭ ەنشىسىندە قازىر ەكى عانا بەلبەۋ بار. ءبىرى - vacant WBO Inter- Continental ياعني، ايماقتىق WBO بەلبەۋىنە ۇمىتكەر، ەكىنشىسى - WBA Fedelatin. بەس جىلداعى قانات يسلامنىڭ ءوزى ءۇشىن اۋىز تولتىرىپ ايتاتىن ناتيجەسى وسى. ال، جانكۇيەر رەتىندە بۇعان ءبىزدىڭ كوڭىلىمىز تولمايدى. سەبەبى، قاناتتىڭ چەمپيوندىق بەلبەۋگە شىعاتىن ۋاقىتى ءوتىپ بارا جاتىر. وعان پروموۋتەر مەن باپكەرىن اۋىستىرۋ كەرەك دەگەن ءسوز ەل ىشىندە ءالسىن- ءالسىن ايتىلىپ جاتىر، ءبىراق ەندى ءبارى كەش سياقتى. قانات بيىل 23 جاسقا تولىپ جاتسا، ونىڭ چەمپيوندارمەن كەزدەسۋى ءالى الدا دەپ ءوزىمىزدى جۇباتۋشى ەدىك، وكىنىشكە قاراي ول بيىل 33 جاسقا تولادى. ۋاقىت پەن كۇش- قۋاتتى ەشكىم ۇستاپ تۇرا المايتىنى بەسكە بەستى قوسقاندا 10 بولادى دەگەندەي ايدان انىق قوي.

گولوۆكين الەمدىك بوكسشى، يسلام حالىقتىق بوكسشى

بىردەن ايتايىق، گەنناديي مەن قاناتتى سالىستىرۋعا مۇلدەم كەلمەيدى. ەكەۋىن سالىستىرۋدىڭ ءوزى بوكس ماماندارى مەن جانكۇيەرلەر ءۇشىن ابەستىك بولادى. ەكەۋى دە ەكى بولەك بوكسشى، ەكى بولەك دەڭگەي. ءبىراق، بۇگىندە قازاقستاندىق بوكس جانكۇيەرلەرى اراسىندا ەكى بوكسشىنى سالىستىراتىنداردىڭ قاراسى كوبەيىپ كەتتى. جانكۇيەرلەردىڭ سالىستىرۋى زاڭدىلىق ەكىنى انىق. ال، ءبىز جۋرناليست رەتىندە ەكى بوكسشىنى نە ءۇشىن سالىستىرۋعا بولمايتىنىن، ەكەۋىنىڭ وتكىزىپ جۇرگەن جەكپە- جەكتەرىنەن-اق بايقاۋعا بولاتىنىن ايتقىمىز كەلەدى. ياعني، گەننادي الەمدىك دەڭگەيدەگى «big drama show» وتكىزىپ جۇرسە، قانات حالىقتىق دەڭگەيدەگى بوكس كەشىن وتكىزۋمەن اۋرە. قانات يسلامنىڭ قارسىلاستارىنىڭ دەڭگەيىن ايتپاعاندا، بۇگىنگە دەيىن ءالى رەيتينگتىك جەكپە- جەكتەر وتكىزىپ ءجۇر. گەنناديي vacant WBO Inter- Continental اتاعىن 17-، WBA چەمپيوندىق بەلبەۋىن 20- كەزدەسۋىندە السا، قانات 22- كەزدەسۋىندە vacant WBO Inter- Continental بەلبەۋىن يەلەندى. تاعى ءبىر ايتا كەتەرلىگى، قانات يسلامنىڭ 23 كەزدەسۋىندەگى 9 قارسىلاسىنىڭ جەڭىسى مەن جەڭىلىسىنىڭ ايىرماشىلىعى جەرمەن كوكتەي. ءتىپتى، ءبىر رەت بولسىن جەڭىلىسى جوق قارسىلاسپەن كەزدەسۋ وتكىزبەپتى.

بالكىم، قازاقستاندا كاسىپقوي بوكس ەندى دامىپ كەلە جاتقان سوڭ بولار جانكۇيەرلەر تەحنيكالىق ناتيجەلەرگە اسا قاتتى ءمان بەرە بەرمەيدى. ۇتتى ما، ۇتتى. بولدى. قارسىلاسىنىڭ دەڭگەيى ولاردى قىزىقتىرمايدى. ءبىراق، 5-10 جىلدان كەيىن ەلىمىزدە جانكۇيەرلىك «مادەنيەت ارتىپ» قاناتتىڭ قارسىلاستارىنا قاراپ، جوعارىدا «حالىقتىق بوكسشى» دەپ ايتقانىمىزدى تۇسىنەتىن بولادى.

وسى ورايدا قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكونىڭ مىنا پىكىرىن كەلتىرە كەتەيىك: «مەن تۇسىنبەيمىن، وعان (قانات يسلامعا - رەد) جەڭىلىسى وتە كوپ قارسىلاستىڭ نە كەرەگى بار؟ بۇل قاناتتىڭ تاجىريبەسى مەن اتاعىنا سىن كەلتىرەدى. كانات يسلام ايماقتىق بەلبەۋلەردى جيناۋدى دوعارىپ، تيتۋلدىق جەكپە- جەكتەر وتكىزۋ كەرەك. پروموۋتەرىنىڭ نە ويلاپ جۇرگەنىن تۇسىنبەدىم. ول يسلامنىڭ تيتۋلدى جەكپە- جەگىنە جەتپەي، تەك سىبىستىڭ ورتاسىندا قالعانىن قالاي ما؟ ەگەر 1-2 جىلدىڭ ىشىندە تيتۋلدى جەكپە-جەك وتكىزبەسە، ارى قاراي كەش بولادى. تەزىرەك الەم چەمپيونى اتانۋ كەرەك» دەيدى دەميانەنكو.

وسىدان 1-2 جىل بۇرىن قازاقستاندىق جانكۇيەرلەر «وتاندىق تەلەارنالار گەنناديدىڭ جەكپە- جەگىن كورسەتكەنشە نەگە ءوزىمىزدىڭ قاناتتىڭ كەزدەسۋىن كورسەتپەيدى» دەگەن سىڭايداعى پىكىر ايتىلىپ ەدى. ونىڭ سەبەبىن سپورت جۋرناليسى اباي وتار بىلاي تۇسىندىرەدى:

«قاناتتىڭ (2015 -جىلى دجوناتان باتيستاعا قارسى كەزدەسۋىن) بوكسىن وتاندىق تەلەارنا نە ءۇشىن كورسەتپەدى بىزدە؟ بىرىنشىدەن، ءار ءتۋرنيردى تۇسىرۋگە قۇقىلى بەلگىلى تەلەارنا بولادى. باسقا ەلدەر جەكپە- جەكتى كورسەتۋى ءۇشىن رۇقساتناما ساتىپ الۋى كەرەك. بۇل جولى اتالعان جەكپە- جەكتىڭ قۇقىعى NBC ارناسىنا تيەسىلى بولدى. تەك سولار عانا ءتۇسىرىپ، كورسەتۋگە قۇقىلى ەدى. ەكىنشىدەن، اتالعان ارنا قاناتتىڭ جەكپە- جەگىن ءتىپتى كورسەتكەن جوق. مەن ينتەرنەتتەن كورسەتىپ قالار دەپ الگى ارنانى قاداعالاپ وتىرعانمىن. ونىڭ ورنىنا فۋتبول ماتچىن كورسەتىپ كەتتى. نەگە؟ اۋەلى سول كۇنگى نەگىزگى جەكپە-جەك كەۆين بيزيە مەن فرەدريك لاۋسون اراسىندا بولعان- تۇعىن. قانات يسلامنىڭ كەزدەسۋى قوسىمشا، بوكس تىلىمەن ايتقاندا اندەركارت ەدى. سوندىقتان، اتالعان ارنا قاناتتىڭ بوكسىن كورسەتكەن جوق. مىنە، بارى وسى» .

سوڭعى جىلدارى قانات يسلام ەلگە ءجيى كەلگىشتەپ كەتتى

«نۋ ي چتو، كەلسە ءوز جەرىنە كەلىپ جاتىر، وندا تۇرعان نە بار؟» دەپ ورە- تۇرەگەلۋىڭىز مۇمكىن. اسىقپاڭىز. ساسقانىمىزدان اۋزىمىزعا اباي تۇسەدى دەمەكشى، قاناتتى ايتقاندا ەسكە گولوۆكين ورالادى. بىرنەشە تۇجىرىم بويىنشا الەم چەمپيونى گەننادي گولوۆكيننىڭ ءوزى قازاقستانعا ەكى-ءۇش جىلدىڭ ىشىندە ءبىر كەلەدى. كەلسە دە، چەمپيوندىق اتاعىن قورعاپ نەمەسە چەمپيوندىق اتاق قوسىپ ەلگە ورالادى. ال، قانات يسلام جىلىنا 3-4 رەيتينگتىك كەزدەسۋ وتكىزىپ، ەلگە 2-3 رەت كەلىپ كەتەدى. وسىندايدا، بالا كەزىمىزدە ۇيىنەن تىسقا شىعۋ قيىن قاتارلاستارىمىزدى «ءۇي كۇشىك» دەپ مازاقتايتىنىمىز ەسكە تۇسكەنىن قاراڭىزشى. وسى ءسوزدى قاناتقا قاراتا ايتقىمىز كەلمەيدى، ءبىراق...

قازاق بولعان سوڭ ەل باتىرىن اسقا، ودان قالسا ماسسوۆكاعا شاقىرادى، ودان بوساپ جاتسا كورشى اۋىلداعى بايشىكەشتىڭ كوكپارىنا الدىرتادى. بارماساڭ وزىڭە زيان ءتيىۋى نەمەسە كوكەڭ رەنجىپ قالۋى مۇمكىن. ايتەۋىر، ەسىل ۋاقىتتىڭ كەتكەنى. قايتا تەككە وتكىزگەن ۋاقىتتى جاتتىعۋ زالىندا پايدالانىپ، كەلەسى قارسىلاسىنا دايىندىعىن كۇشەيتسە. ءبىز قانات ەلگە كەلمەسىن دەپ تۇرعانىمىز جوق. كەلسىن. ءبىراق، بەلگىلى دارەجەنى باعىندىرىپ، ءوزىن جانكۇيەرلەرىنە ساعىندىرىپ كەلسە ەكەن دەيمىز. كاسىپقوي بوكستاعى شىڭعا جەتىپ، ميسسياسىن ورىنداپ كەلسە ءبىر ءجون. سودان سوڭ، سەرىلىك قۇرىپ ەل كەزىپ، كوكپاردان كوكپار تارتىپ، الدە اۋىل ارالاپ جاستاردى بوكسقا باۋلي ما ەندى ول ءوز ەركىندە.

قانات يسلامنىڭ اۋزىنا ءسوز سالىپ جۇرگەن كىم؟

قاناتتى بۇرىننان ۇلتجاندى، ەلىن، جەرىن سۇيەتىن ادام ەكەنىن بىلەمىز. ءبىراق، سوڭعى ۋاقىتتا قاناتتان باسقا ەشكىم ەلىن ويلامايتىن، ۇلتىن سىيلامايتىن سياقتى كورىنىپ كەتەدى. الىسقا بارماي-اق، سوڭعى روبسون اسسيسكە قارسى وتكەن جەكپە-جەگىندەگى ءسوزىن ەسكە تۇسىرەيىكشى. كەزدەسۋ سوڭىندا دا، ەلگە كەپ جۋرناليستەرگە بەرگەن سۇحباتىندا دا «قاباعىم جارىلعاندا ءبىر سەكۋند ىشىندە ەلىمدى ويلادىم» دەيدى. سوندا قاناتتىڭ قاباعى جارىلدى دەپ بۇكىل الەم قازاقستاندى كۇلكى قىلا ما الدە قازاقستانعا كەلەتىن جاۋ يسلامنىڭ قاباعى جارىلۋىن كۇتىپ ءجۇر مە؟ نەمەسە قاناتتىڭ بۇكىل ابىرويى قازاقستانعا تىرەلىپ تۇر ما ەكەن؟

شىندىعىنا كەلگەندە ول ەلىن ەمەس، ءوزىن ويلادى. ءوزىنىڭ سول كەزدە جەڭىلىپ قالماۋىن، جانكۇيەرلەرگە ماسقارا بولماۋىن عانا ويلادى. باسقا تۇك ويلاعان جوق. ال، ول ەلىمدى ويلادىم دەپ ويلانباي ايتىپ، سوزدەن «اۆاريا» بولاتىنىن ويلاعان جوق. الدە قازاق جانكۇيەرلەرىن ساۋاتسىز دەپ ويلاي ما؟ قاناتتىڭ جەڭىلگەنىنەن قازاقستاننىڭ ابىرويى كەمىپ قالمايدى، ءتىپتى قانات يسلامنىڭ قازاقستاننان ەكەنىن سول كەشتىڭ ۇيىمداستىرۋشىلارى مەن بوكسشىلار عانا بىلگەن شىعار. باسقا ەشكىم بىلمەيدى. قاناتتى الەم تانۋى ءۇشىن الەمگە تانىلعان بوكسشىمەن جۇدىرىقتاسۋ كەرەكتىگىن ايتپاساق تا ءبىلىپ وتىرعان شىعارسىز. قالعانىنىڭ ءبارى بوس اڭگىمە.

سپورتتى ۇلتقا، دىنگە جانە ناسىلگە تەڭەۋگە بولمايتىنىن سپورتشى جاقسى ءبىلۋى ءتيىس. اۋەلدە سپورت ويىندارىن ويلاپ تاپقان ويشىل ويىنشى، وليمپيادانى ۇيىمداستىرعاندا ەل مەن ەلدى، ۇلت پەن ۇلىستى بىرىكتىرۋ ءۇشىن، دوستىقتى ارتتىرۋدى ويلاعان ەدى. شەتەلدىكتەر وسى ءتامسىلدى ۇستانىپ، سپورتتى تەك سپورت رەتىندە تۇسىنەدى.

سپورتتى ۇلتقا اكەپ تىرەي بەرەتىن تەك ءبىز عانا شىعارمىز. مىسال كەرەك پە؟ مىنە مىسال: «ءبىزدىڭ ەل ءۇشىن اتاقتان بۇرىن باۋىرمالدىق ءبىرىنشى ورىندا تۇرادى. گولوۆكين ەكەۋمىز ءبىر- ءبىرىمىزدى ساباعانشا، ول ءوز سالماعىندا مەن ءوز سالماعىمدا چەمپيون بولۋ الدەقايدا ارتىق دەپ ويلايمىن» دەيدى قانات يسلام.

سپورتشى سپورتتى تاڭداعاندا بارىنە دايىن بولۋ كەرەكتىگىن قانات مەنەن ارتىق بىلەدى دەپ ويلايمىن. بارلىق سپورتشىنىڭ ارمانى - قارسىلاستىڭ كىم بولۋىنا قاراماستان الەمدى باعىندىرۋ ەكەنىن دە مەنەن 100 ەسە ارتىق بىلەدى.

وسىنىڭ ءبارىن بىلە تۇرىپ، كارەراسىندا قازاق بوكسشىمەن كەزدەسىپ قالاتىنىن بىلمەدى مە سوندا؟ الدە ءبىر-بىرىمەن جۇدىرىقتاسىپ جۇرگەن شەتەلدىكتەر اقىماق، ۇلتىن ويلامايتىن نامىسسىزدار ما؟ قانات جەكپە- جەككە شاقىرىپ جۇرگەن مەكسيكالىق «كانەلو» الداعى جەكسەنبى كۇنى وتانداسى كىشى حۋليو سەزار چاۆەسپەن جۇدىرىقتاسادى.

«ەكەۋمىز دە ءبىر ەلدىڭ بىلدەي ازاماتتارىمىز، باۋىرلىعىمىز تاعى بار، الەم الدىندا ءبىر- ءبىرىمىزدى ساباعانىمىز ۇيات بولادى» دەپ جاتقان ولار جوق. سەبەبى، مۇنىڭ سپورت ەكەنىن، رينگتە عانا قارسىلاس، ومىردە قانداس ەكەنىن بىلەدى. جانكۇيەرلەر دە ونى تۇسىنەدى. بوكس ولاردىڭ ماماندىقتارى. بۇل جەردە ەكەۋىنىڭ ناعىز ءوز سالاسىنىڭ ماماندارى ەكەنىن اڭعارۋعا بولادى. بىرەۋدىڭ اۋزىنا قاقپاق بولا المايمىز. دەگەنمەن، ەل الدىندا جۇرگەن ازامات بولعان سوڭ ءار سوزىنە اباي بولۋ كەرەك قوي. قاناتتىڭ اۋزىنا ءسوز سالىپ جۇرگەندەر وسى جاعىن ەسكەرسە دەيمىز.

وسى ماقالانى جازىپ جاتقانىمىزدا بىزگە كومەك بولسىن دەدى مە، الدە وي قوسايىن دەدى مە ايتەۋىر، فەيسبۋك الەۋمەتتىك جەلىسىن قولدانۋشى جاندوس قۇسايىنوۆ مىرزا مىناداي ءبىر پوست جازدى. سونى سىزدەرگە قاز- قالپىندا جەتكىزۋدى، ارتىق ەشقانداي وي قوسپاۋدى ءجون كوردىك.

«گولوۆكيننىڭ جەتىستىگى ەلىمىزدىڭ ءبىرقاتار بوكسشىلارىنا شابىت الدە موتيۆاتسيا سىيلادى عوي. سوڭعى كەزدە قازاق ازاماتتارىنىڭ كاسىپقوي بوكسقا نەمەسە كاسىپقوي توبەلەسكە كوپتەپ بارۋى قۋانتادى. ءبىراق ءبىر وي بار ەدى. لاقاپ اتقا نەگە «قازاق»، «البان»، «نايمان» دەگەن ۇلت، رۋ اتاۋلارىن تاڭدايدى ەكەن؟ مەن بۇل تاڭداۋدان مينيمۋم ەكى ۇنامسىز دۇنيەنى كورەمىن. ءبىرىنشى، ەگەر الدا-جالدا قانات باۋىرىمىز شارشى الاڭدا جەڭىلىس تاۋىپ جاتسا، قازاق جەڭىلگەن بولا ما؟ ءبىرتۇرلى. ارينە، جەڭىلمەسىن دەيتىن، تىلەۋىن تىلەپ، تاقىم قىسىپ وتىراتىن جاننىڭ ءبىرىمىن. ءبىراق سپورت ول - سپورت. ءبارى مۇمكىن. سوندىقتان قانات «قازاق» يسلامنىڭ اگاراگي بولۋى كادىك جەڭىلىسى تىم اۋىر مەن ءۇشىن.

ەكىنشىدەن، رۋ اتاۋلارىن جەلەۋلەتىپ شىعۋ دا ءبىرتۇرلى. وتكەندە قالىڭ نايماننىڭ اتىن ەنشىلەگەن قۋات «نايمان» جەڭىلدى. نايمان جەڭىلدى. وي، قانداي اۋىر... قازىر «البان» دەگەن لاقاپ اتپەن ايدار شاريبايەۆ ەسىمدى جىگىت كاسىبي الاڭدا قولعاپ كيىپ ءجۇر. بۇل عادەت باسقا دا سپورتشىلارعا جۇعۋى ابدەن مۇمكىن. بۇل - رۋدى اسپەتتەۋ مە، بولشەكتەۋ مە، نە تەندەنتسيا؟ «قازاق رۋعا بولىنبەيدى، رۋدان قۇرالادى». ەندەشە، نايمان، البان، اداي دا قازاقتىڭ ءوزى. جاۋاپكەرشىلىگى اسا اۋىر ۇلت، رۋ اتاۋىن اۋمالى- توكپەلى سپورتتىڭ تارازىسىنا تاستاپ جىبەرۋ قالاي بولار ەكەن...».

ءتۇيىن

نەگىزگى ايتپاق ويىمىز، قاناتتى سوگۋ نەمەسە ابىرويىنا نۇقسان كەلتىرۋ ەمەس. بىزدىكى تەك جانكۇيەرلىك كوزقاراس قانا. كوزگە كورىنىپ تۇرعان كەمشىلىكتى، قاتەلىكتى ايتۋ. ەگەر، وسىندا قانات يسلامنىڭ ناتيجەسىن جوققا شىعارىپ، قاتە ءسوز جازىپ قويعان بولساق كومانداسىنان جانە وزىنەن كەشىرىم سۇرايمىز.

راس، ءبىز ونىڭ كومانداسىندا قانداي اڭگىمە، قانداي جوسپار، كەلىسسوزدەر ءجۇرىپ جاتقانىن بىلمەيمىز. ءبىراق، جوعارىدا ايتقانىمىزدى ولار دا جوققا شىعارا المايتىنى انىق. قانات يسلام وسى ايتقاندارىمىزدى جوققا شىعارىپ، ءوزىن الەمگە مويىنداتسا شىن قۋاناتىن ەدىك. سولاي بولسىن دەپ تىلمەيمىز. «ايتىلماسا ءسوزدىڭ اتاسى ولەدى» دەگەندەي كوزگە بادىرايىپ كورىنىپ تۇرعان كەلەڭسىز دۇنيەلەردى ايتپاق بولدىق. قانات يسلام تەزىرەك الەم چەمپيونى اتانىپ، دۇنيەجۇزىنە تانىلعانىن قالايمىز. ءبارى وسى عانا.

ال، ءسىز قانات يسلامدى قاي ناتيجەسى ءۇشىن ەلگە ۇلگى ەتىپ جۇرگەنىڭىزدىڭ جاۋابىن تابا الدىڭىز با؟

ماقالا اۆتورى: اسقار تاۋداي

  دەرەككوز: szh.kz