تۆيتەر الەۋمەتتىك جەلىسى تاۋلىك بويى جاڭالىق تاراتاتىن ونلاين-تەلەارناسىن ىسكە قوسادى

استانا. قازاقپارات - Twitter Bloomberg Media-مەن بىرلەسىپ تاۋلىك بويى جاڭالىقتار تاراتاتىن تەلەارنانى ىسكە قوسۋدى جوسپارلاپ جاتىر.

جوبا الەۋمەتتىك جەلىدە ونلاين-تەلەارنا تۇرىندە جۇزەگە اساتىن بولادى، دەپ حابارلايدى لەنتا. رۋ.

تەلەارنا وسى كۇزدە قوسىلۋى مۇمكىن. اتاۋى قويىلماعان اتالمىش ارنا الەمنىڭ تۇكپىر- تۇكپىرىندەگى ءوز جاڭالىقتارىن تىكەلەي تاراتىپ، Twitter قولدانۋشىلارىنىڭ تەكسەرىلگەن ۆيدەولارىن كورسەتەتىن بولادى. Bloomberg Media اتقارۋشى ديرەكتورى دجاستين سميت (Justin Smith) اتاپ وتكەندەي، كوپشىلىك قاۋىم جاڭالىقتاردى تەلەارنالاردان تاماشالاپ، بولعان وقيعانى الەۋمەتتىك جەلىلەردە تالقىلايدى. ال، بۇل كومپانيالار وسى ءىس-ارەكەتتەردى ءبىر جەلىدە بىرىكتىرمەكشى.