سيريا ۇكىمەتىنىڭ دەلەگاتسياسى استاناعا كەلدى

استانا. قازاقپارات - ب ۇ ۇ جانىنداعى سيريانىڭ تۇراقتى وكىلى باشار دجاافاري باستاعان سيريا ۇكىمەتىنىڭ دەلەگاتسياسى جانە ب ۇ ۇ ساراپشىلارى سيرياداعى جاعدايدى رەتتەۋ جونىندەگى حالىقارالىق كەزدەسۋگە قاتىسۋ ءۇشىن استاناعا كەلدى.

كەزدەسۋدى 3-4 -مامىردا وتكىزۋ كوزدەلىپ وتىر. بۇل تۋرالى ت ا س س تىلشىسىنە قازاقستان سىرتقى ىستەر مينيسترلىگى باسپا ءسوز قىزمەتىنىڭ باسشىسى ءانۋار جايناقوۆ حابارلادى. «استاناداعى كەلىسسوزگە قاتىسۋ ءۇشىن باشار دجاافاري باستاعان سيريا ۇكىمەتىنىڭ دەلەگاتسياسى جانە ب ۇ ۇ ساراپشىلارىنىڭ دەلەگاتسياسى كەلدى»، - دەپ ءمالىم ەتتى جايناقوۆ تەلەفون ارقىلى.

سيرياداعى جاعدايدى رەتتەۋ بويىنشا جوعارى دەڭگەيدەگى ءتورتىنشى حالىقارالىق كەزدەسۋ قازاقستان استاناسىندا 3- جانە 4 -مامىردا وتەدى. ونىڭ الدىندا، 2 -مامىردا ساراپشىلار دەڭگەيىندەگى كەزدەسۋ جوسپارلانىپ وتىر. بۇدان بۇرىنعى 14 جانە 15 -ناۋرىزدا بولعان حالىقارالىق كەزدەسۋگە سيرياداعى ۇرىس قيمىلدارىنىڭ توقتاتىلۋىنا بىرلەسە كەپىل بولاتىن ەلدەر (رەسەي، تۇركيا جانە يران) دەلەگاتسياسى، سونداي-اق ب ۇ ۇ، يوردانيا، ا ق ش، سيريا ۇكىمەتىنىڭ وكىلدەرى قاتىسقان ەدى.