ايگىلى ارتىستەر استانادا قويىلاتىن «بوگەما» وپەراسىندا ونەر كورسەتەدى
ەڭ ادەمى سوپرانو داۋىسىنىڭ يەسى ساندرا پلامەناتس جانە ارمياندىق باس باجبەۋك- مەليكيان ساركيس دج. پۋچچينيدىڭ «بوگەما» وپەراسىندا ونەر كورسەتەدى.
شاقىرىلعان ۆوكال شەبەرلەرىمەن قاتار 5 -مامىردا «استانا وپەرا» ۇلكەن زالىندا قازاقستاندىق ارتىستەر - نۇرلان بەكمۇحامبەتوۆ، تالعات مۇسابايەۆ، ءالفيا كارىموۆا، ەۆگەني چاينيكوۆ شىرقايدى. ديريجەرلىك تىزگىندە - قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ. رەجيسسەرى - ناتاليا كاگادي. ساندرا پلامەناتس تىگىنشى ميميدىڭ پارتياسىن ورىنداۋعا دايىندالۋدا. سۇرانىسقا يە ءانشى ءوزىنىڭ جوعارى كاسىبي شەبەرلىگىمەن تانىمال، قاھارماندارىن جاقسى ءتۇسىنۋ جانە ساحنادا تەرەڭ بەينەلەردى جاساۋ ءۇشىن نەگىزگى مۋزىكالىق ءبىلىمى بار (ماسكەۋ كونسەرۆاتورياسى) ول ۆەنالىق جانە ماسكەۋلىك فيلولوگيالىق فاكۋلتەت پەن شەت تىلدەرى فاكۋلتەتىن بىتىرگەن.
بارلىق وپەرالار ايگىلى ادەبي شىعارمالاردىڭ جەلىسى بويىنشا قويىلعانى بەلگىلى، وسى ورايدا اتالعان وقۋ ورىندارىندا ول قاينار كوزدەردەن ءبىلىم ءنارىن سۋسىندادى. ايتا كەتسەك، دج. پۋچچينيدىڭ «بوگەما» وپەراسى انري ميۋرجەنىڭ «بوگەما ومىرىنەن كورىنىستەر» شىعارماسى بويىنشا جازىلعان.
«مەن ءوزىمنىڭ كەيىپكەرىممەن ماقتانامىن. وپەرا جەلىسى 1830 -جىلى پاريجدە ءوربيدى. ءتىپتى بۇگىن دە ول جەردە جالعىز ءومىر ءسۇرۋ قيىن، ال ميمي بولسا، سول ۋاقىتتا پاريجدىڭ لاتىن كۆارتالىنان ءوزى پاتەر جالداپ تۇرادى جانە ءوزى جىبەكتى كەستەلەيدى - بۇل وتە كۇردەلى جانە كوپ ەڭبەكتى كەرەك ەتەتىن شىعارماشىلىق جۇمىس، ول وسى تابىسىمەن كۇنىن كورەدى. ارينە، ونىڭ ءومىرى قايعىلى اياقتالادى، ءبىراق ول سۇيىكتى ىسىمەن اينالىسا وتىرىپ، ەركىن ءومىر ءسۇردى جانە سۇيىكتى ادامىن كەزدەستىردى. ميميدىڭ تاعدىرى ءومىردىڭ ءاربىر ءساتىن باعالاۋ قاجەت ەكەنىن تۇسىنۋگە كومەكتەسەدى.
مەن بۇل پارتيانى «استانا وپەرا» ساحناسىندا قۋانا- قۋانا ورىندايمىن. بۇل مەنىڭ قازاقستانعا العاشقى كەلۋىم، ايتسە دە مەن قازاقتىڭ كوركەم تابيعاتى تۋرالى اباي قۇنانبايەۆتىڭ ولەڭدەرىنەن وقىدىم جانە بۇل سيپاتتامانى راستايتىن كوپ بەينەتۇسىرىلىمدەردى قارادىم»، - دەيدى ساندرا پلامەناتس.
ارمياندىق باس ساركيس باجبەۋك- مەليكيان كوللەن پارتياسىن ورىندايدى، ونىڭ اۋقىمى جاعىنان زور جانە بارلىق رەگيستر بويىنشا ادەمى داۋسى الىس جانە جاقىن شەت ەلدەگى ءتۇرلى ساحنا تىڭدارمانىن ءتانتى ەتەدى. «بوگەما» - ستيلى مەن رۋحى بويىنشا فرانسۋزدىق دەۋگە بولاتىن، تاڭقالارلىق نازىك سەزىممەن ەرەكشەلەنەتىن يتاليالىق وپەرا. وقيعا جەلىسى ءپاريجدىڭ لاتىن كۆارتالىندا روجدەستۆو قارساڭىندا ءوربيدى. وپەرا كەيىپكەرلەرىنىڭ ءبارى جاستار. بۇلار كەدەي زيالى قاۋىم، پاريجدەگى مانساردا تۇرعىندارى: اقىن رۋدولف، سۋرەتشى مارسەل، مۋزىكانت شونار جانە فيلوسوف كوللەن. ومىرلەرىنىڭ سەرىگىنە اينالعان مۇقتاجدىققا قاراماستان، ولار كوڭىلدەرىن تۇسىرمەي، قيىندىقتاردى ازىلمەن قارسى الادى. كۇندەلىكتى ومىرلەرى قۋانىش پەن پوەزياعا، دوستىق پەن ماحابباتقا تولى. ارتىستەر كورەرمەنگە كۇندەلىكتى قام- شارۋانى ءبىراز ۋاقىتقا قويا تۇرىپ، وپەرا قويىلىمىنان بارىنشا راقات الۋعا، سونداي- اق «بوگەما» وپەراسى كەيىپكەرلەرىنەن، ءتىپتى، ەڭ قيىن جاعدايدىڭ جاقسى جاعىن كورە ءبىلۋدى ۇيرەنۋگە جانە ءوز باقىتىڭ ءۇشىن كۇرەسۋدى توقتاتپاۋعا شاقىردى.
