پاۆلودار وبلىسىندا ەكى مىڭعا جۋىق تۇرعىن ۆەلوجارىسقا قاتىستى - فوتو
ولار ۇزىندىعى 30 شاقىرىم جولدى ءجۇرىپ ءوتۋى ءتيىس بولدى. «بۇل باسەكەگە قاتىسىپ وتىرعان ازاماتتاردىڭ باسىم بولىگى - اۋەسقويلار»، - دەيدى دەنە تاربيەسى جانە سپورت باسقارماسى باسشىسىنىڭ ورىنباسارى ولەگ كوليەۆ.
- ءاربىر قاتىسۋشىنىڭ قولىنا «ەكسپو-2017» لوگوتيپى بار جالاۋشا تابىستالدى. بۇل شارادا سىيلىقتار مەن گراموتالار بەرىلمەيدى. مۇنداعى باستى ماقسات - ءوز كۇشىمىزدى تەكسەرۋ، قاشىقتىقتى باعىندىرۋ. ال، جارتىلاي كاسىبي ماماندار ءۇشىن بۇل كەزەكتى جاتتىعۋ رەتىندە ەسەپتەلدى.
ايتا كەتەرلىگى، ۆەلوجۇگىرىسكە قاتىسۋشىلاردىڭ اراسىندا ءوڭىر باسشىسى بولات باقاۋوۆ، قالا اكىمى نۇرجان اشىمبەتوۆ، وبلىس اكىمىنىڭ ورىنباسارلارى نيكولاي دىچكو، مەيرام بەگەنتايەۆ، ءاليا ارىنوۆا جانە باسقارما باسشىسى مارات ايداشەۆ بولدى.
شاراعا قاتىسۋشىلارعا «ەكسپو-2017» كورمەسىنىڭ ەرىكتىلەرى قولداۋ كورسەتتى. 
- اۋا رايىنىڭ قولايسىزدىعىنا قاراماستان قاشىقتىقتى ءجۇرىپ وتتىك، - دەدى وبلىس اكىمى بولات باقاۋوۆ.
- مەن ۆەلوسيپەدكە ءجيى مىنەمىن. جاز بويى جاس ۆەلوسيپەدشىلەرمەن سەرۋەندەپ، ۆەلوسپورتقا ارنالعان الاڭ دايىندايمىز. ەندىگى جاستارمەن كەلىسىپ تە قويدىق. كۇن جىلىعاننان كەيىن كاچير اۋدانىنا بارىپ، ءجۇز شاقىرىمدى ءجۇرىپ وتەمىز. مەن سپورتتىڭ بارلىق تۇرىنە قاتىسۋعا تىرىسامىن.
«ايتارلىقتاي قيىن بولمادى. سەبەبى ءبىز بۇدان دا ۇزاق قاشىقتىققا شىعامىز»، - دەيدى №1 بالالار- جاسوسپىرىمدەر سپورت كلۋبىنىڭ 10 جاستاعى تاربيەلەنۋشىسى ياروسلاۆ گۋسيەۆ. - ۆەلوسپورتپەن اينالىسقانىما ەكى جىل بولدى. بۇگىن بىزبەن بىرگە اكىمنىڭ ءجۇرىپ وتكەنىنە قۋانىشتىمىز.
