تەڭىز اسكەري فلوتىنداعى جالعىز بويجەتكەننىڭ ءومىر ءسۇرۋ ءتارتىبى قانداي؟ - كەسكىن

استانا. قازاقپارات -   ەلىمىزدىڭ باتىس وڭىرىندەگى اسكەري- تەڭىز فلوتى جاقىندا جاڭا كەمەمەن تولىعادى. «ماڭعىستاۋ» زىمىراندى- ارتيللەريالىق كورابلى سۋعا تۇسىرىلگەن سوڭ جايىق بويىمەن كاسپي جاعاسىنداعى قالاعا جول تارتادى.

جاۋىنگەرلىك كەمەنى تەڭىزشىلەر ورال قالاسىندا قابىلداپ الماق. ەكيپاج مۇشەلەرىنىڭ اراسىندا داريا كيريچەنكو دا بار. 22 جاستاعى داريانىڭ نەگىزگى ماماندىعى - ەكونوميست. فلوتقا ءۇش ايلىق اسكەري كۋرستان كەيىن كىشى كورابل مامانى بولىپ قابىلدانادى. سىناقتان سۇرىنبەگەن تەڭىزشى قىز كەمە جالاۋشالارىمەن بەلگى بەرۋدى شەبەر مەڭگەرگەن. قىزمەتى - ارنايى وپەراتسيالار كەزىندە وزگە كورابلدەردەن بەرىلەتىن اقپاراتتى ساناۋلى سەكۋندتا انىقتاپ، كومانديرگە جەتكىزۋ.

داريانىڭ اسكەري تەڭىز فلوتىندا قىزمەت اتقارىپ جۇرگەنىنە جارتى جىلدان استى. ءوز مىندەتىن تياناقتى ورىندايتىن بويجەتكەن اشىق تەڭىزدەگى العاشقى كۇنىن كۇلكىمەن ەسكە الادى. «ورال» زىمىراندى- ارتيللەريالىق كورابلىنىڭ بايلانىسشى- تەحنيگى داريانى كەمە ەكيپاجى ەر- ازاماتپەن تەڭ سىيلايدى.

داريا كيريچەنكو، «ورال» زىمىراندى- ارتيللەريالىق كورابلىنىڭ بايلانىسشى- تەحنيگى:

 - اسكەري قىزمەتشىلەر وتباسىندا تۋىپ- ءوستىم. تەڭىزشى فورماسىن كيۋ بالا جاستان ارمانىم. تىلەگىم ورىندالىپ، جاۋىنگەرلىك كەمەگە قابىلداندىم.

ەكيپاج ەر- ازاماتتاردان تۇرادى. ارينە، تەڭىزدە قىزمەت ەتۋ قىز بالاعا وڭاي ەمەس. دەگەنمەن اسكەري ءومىردىڭ ءتارتىبى بارلىعىمىزعا بىردەي. جاۋىنگەرلىك كەمەدە ءتارتىپ قاتال. داريا كورابلدىڭ ىشكى جانە سىرتقى بايلانىسىن قامتاماسىز ەتۋدەن بولەك، اسكەري فورما تازالىعىنا وزگە تەڭىزشىلەردەي جاۋاپتى قارايدى.

ت م د ەلدەرى بويىنشا جالعىز تەڭىزشى قىز اتانعان جانار يبرايەۆا دا وسى كەمەدە بايلانىسشى قىزمەتىن اتقارىپتى. بۇگىندە ول «قازاقستان» كورابلىندە ەڭبەك ەتەدى. ءوزى سياقتى تەڭىزشى قۇربىسىنىڭ ورنىن باسقان داريانى كەمە ەكيپاجى جاتىرقامادى.

سۇلتان بيماعامبەتوۆ، كەمە اسپازى:

 - داريا كەمەدەگى جالعىز قىز بولعان سوڭ مەرەكە كۇندەرى توسىنسىي جاساپ تۇرامىز. مىسالى، 8 -ناۋرىزدا ۇزبە قامىر يلەپ، بورش ءپىسىردىم. ويتكەنى ونىڭ ۇلتى ۋكراين. جورىق كەزىندە ىرىمشىك قوسىلعان ۆارەنيكتەر ازىرلەپ، كوڭىلىن كوتەرۋگە تىرىسامىز.

«ورال» كەمەسىندە كاسىبي بىلىكتىلىگىن شىڭداعان بويجەتكەن جاقىن كۇندەرى سۋ جاڭا كورابلگە اۋىسادى. ءوز سىنىبىندا فلاگمان سانالاتىن جاۋىنگەرلىك سۋ كولىگىندە اسكەري قىزمەت اتقاراتىنىن ماقتانىش سانايدى.

www.24.kz