ديماش تۋرالى اقپاراتتىڭ ازدىعىنا قىتايداعى جانكۇيەرلەرى الاڭداۋلى
ولار ديماشتىڭ ەلگە ورالعانىنا ءبىر اپتا وتسە دە، ءانشى تۋرالى جان- جاقتى جاڭالىقتار سانى جەتكىلىكسىز، ديماشتىڭ قايدا، نە ىستەپ جۇرگەنىن بىلمەي حابارسىز قالدىق دەپ رەنجۋلى. عالامتوردا «ديماشتىڭ قىتايدا تاعى ءبىراز قالعانى دۇرىس ەدى» اتتى فورۋم اشىلىپ ءانشىنىڭ قىتايلىق جانكۇيەرلەرى وندا وسى تاقىرىپ بويىنشا ءوز پىكىرلەرىن جازدى. جەلى قولدانۋشىلارى ديماشتىڭ تانىمالدىلىعى باسەڭدەپ قالماسا يگى ەدى دەپ بولاشاعىنا الاڭداۋشىلىق ءبىلدىردى.
«قىتايدا قازاقستاندىق جانە قىتايلىق جانكۇيەرلەر ديماش تۋرالى اقپاراتتاردى دەر كەزىندە ءبىلىپ وتىردى. ال قازاقستاندا قىتاي تۇگىلى، قازاق جانكۇيەرلەردىڭ ءوزى ديماشتىڭ نە ىستەپ جۇرگەنىن بىلمەيدى. جالپى العاندا، قىتايدىڭ اقپارات تاراتۋ الەۋەتىنىڭ قازاقستاننان كۇشتى ەكەنىن وسىدان بىلۋگە بولادى»، - دەپ جازدى love2015season ەسىمدى قولدانۋشى.
«بۇل ەكى ەلدىڭ شوۋ- بيزنەسىنىڭ جەر مەن كوكتەي ايىرماشىلىعىن بىلدىرەدى. قازاقستاننىڭ شوۋ بيزنەسى قىتايداعىداي جولعا قويىلماعان، ونداعى «Dears» (ديماشتىڭ جانكۇيەرلەرى) سانى از. ديماش ەلگە ورالعاندا مەملەكەتتىك دەڭگەيدە جاقسى قارسى الىپ ەدى، ءبىراق ودان كەيىن ءبىر اپتا ءوتتى، ەش حابار جوق»، - دەپ جازدى Dryad ەسىمدى قولدانۋشى جانە ول: «ديماش ەندى عانا تانىلىپ كەلەدى، ەگەر ول ءبىر اپتا بويى جۇرت نازارىنان تىس قالسا، وسىعان دەيىن جيناعان اتاق- ابىرويى جوعالىپ كەتۋى مۇمكىن. تۇتاس ءبىر اپتا بويى جاڭالىق لەنتاسىندا كورىنبەگەن جۇلدىزدى فاناتتار كۇتىپ وتىرادى دەيمىسىڭ؟ ولاردىڭ نازارىن باسقا جۇلدىزدار اۋدارىپ اكەتەدى. وسىعان مەنەدجەرلەر كوڭىل ءبولۋى ءتيىس»، - دەپ ءوز ءسوزىن تولىقتىردى.
ءوزىن LL دەپ تانىستىرعان قولدانۋشى قازاقستاندىق فاناتتاردىڭ دا الاڭداپ وتىرعانىن جەتكىزدى: حا- حا، مىنا سۋرەتتى كورىپ كۇلدىم. قىتايلىق فاناتتار عانا حابارسىز قالدى دەسەم، قازاقستاندىق فاناتتاردىڭ دا جاعدايى ءماز ەمەس ەكەن.
«قازاقستاندا ديماشتىڭ ءجۇرىس- تۇرىسى، كيىمى، تانىلۋى، يميدجىمەن اينالىساتىن كوماندا جوق سەكىلدى. بار بولسا دا، قىتايداعىداي بولمايتىن ءتارىزدى»، - دەپ جازدى Dryad.
وعان قولدانۋشى momowx77 جاۋاپ بەردى: «مۇمكىن، سولاي بولار. ديماشتىڭ اتا- اناسى ءوز سۇحباتتارىندا ديماشتىڭ فان- پاراقشاسى جوق ەكەنىن، تەك وزدەرىنىڭ پاراقشاسىندا عانا اقپارات جاريالاناتىنىن ايتقان ەدى» .
Dryad: قىتايلىق جۇلدىزداردىڭ كۇن ءتارتىبى بىرنەشە اي بۇرىن بەلگىلەنىپ، جاڭالىقتار جوسپارلى تۇردە ۋاقىتىمەن شىعىپ وتىرادى. ال قازاقستاندا ديماشتىڭ جۇمىس كەستەسى جوق سەكىلدى. ءبىر اپتا بويى ديماش تۋرالى ەلەڭ ەتكىزەر اقپارات كورمەدىك، - دەپ سىنعا الدى. ايتا كەتەيىك، قىتايدا جانكۇيەرلىك مادەنيەت جاقسى دامىعان. 2000 -جىلدارى وڭتۇستىك- شىعىس ازياعا ايگىلى ءانشى، اكتەر ليۋ دە حوامەن كەزدەسۋ ءۇشىن قىتايلىق قىز ءوز باسپاناسىن ساتىپ، گونكونگقا بارعان جانە بۇل قادامعا ەشقاشان وكىنبەيتىنىن، كۋميرىممەن جۇزدەسسەم دەگەن ارمانىنىڭ ورىندالعانىن ايتقان. ديماشتى دا قىتايلىق جانكۇيەرلەرى تاڭ قالدىرۋدان جالىقپادى. «ماڭگى ءسۇيىپ وتەمىن» ۇعىمىن بىلدىرەتىن 1314 راۋشان گۇلىن، ديماشتىڭ اتىمەن ءۇي سىرتىن بەزەندىرۋىن، ارنايى قازاقستاننان ديماشقا تاماق اكەپ بەرگەندەرىن اتاپ وتپەۋگە بولمايدى.
اۆتور: ايجان سەرىكجان قىزى
