قازىرگى جاستار ءبارى اسپاننان ءتۇستى دەپ ويلايدى - بەكبولات تىلەۋحان

استانا. قازاقپارات - پارلامەنت ءماجىلىسىنىڭ دەپۋتاتى بەكبولات تىلەۋحاننىڭ ايتۋىنشا، «تۋعان جەر» باعدارلاماسى اياسىندا جاستارعا قازىرگى جەتىستىكتەردىڭ قانداي ەڭبەكپەن كەلگەنىن كەڭىنەن ءتۇسىندىرۋ كەرەك، دەپ حابارلايدى قازاقپارات ءتىلشىسى.

«قازىرگى بۋىن - مۇلدەم باسقا بۋىن. بۇلارعا ءبارى اسپاننان تۇسكەن سياقتى. 4G بىردەن كەلگەن سياقتى. استانا وزىمەن-ءوزى قۇرالىپ قالعان سياقتى. ەشقانداي قيىنشىلىقسىز كەلگەن سياقتى. بۇل ۇرپاققا وسىنى ءتۇسىندىرۋ كەرەك بولعاننان كەيىن ەلباسىنىڭ وسى نارسەنى («تۋعان جەر» باعدارلاماسىن - اۆت. ) ايرىقشا قولعا الىپ جاتقان سەبەبى سول.

بۇگىنگى ۇرپاق كوپ نارسەنى بىردەن بىلە قويمايدى. ال ونىڭ تاريحي ساناسىنان، ۇلتتىق كودىنان، تەگىنەن باستاپ ءتۇسىندىرۋدىڭ، كەشەندى تۇردە تاريحي سانانى قالىپتاستىرۋدىڭ ادىستەمەسى قولعا الىنباسا بولمايدى»، - دەدى تىلەۋحان كەشە ەفيرگە شىققان «1 ستۋديا» باعدارلاماسىندا.

باعدارلاماعا قاتىسقان «اۋىل» پارتياسىنىڭ ءتوراعاسى، سەناتور ءالي بەكتايەۆ بولسا، اۋىلعا بەت بۇراتىن كەز كەلدى دەپ سانايدى. «اۋىل ەشكىمگە دە قارىزدار ەمەس. ءبىز قايتا اۋىلعا قارىزدارمىز. سەبەبى ءبىز سول اۋىلدا ومىرگە كەلدىك، ءبىز سول اۋىلدا ءوسىپ- وندىك، سول اۋىل قازاعىمىزدىڭ، حالقىمىزدىڭ رۋحاني بايلىعىن ساقتاپ كالدى، سول اۋىل ءبىزدىڭ مادەنيەتىمىزدى، ءتىلىمىزدى، ءدىنىمىزدى ساقتاپ قالدى. ەندى، سول اۋىلعا بۇرىلاتىن ۋاقىت كەلدى. تۋعان جەردى تۇلەتەتىن كەز كەلدى. تۋعان جەر ءۇشىن قىزمەت ەتەتىن ۋاقىت جەتتى»، - دەپ اتاپ كورسەتتى بەكتايەۆ.

ال قوعام قايراتكەرى، ساياساتتانۋشى بەرىك ءابدىعاليدىڭ ويىنشا، بۇگىندە ءبىلىم سالاسىندا تەحنوكراتيالىق ۇستانىم باسىم بولىپ كەتتى. سونىڭ سالدارىنان رۋحاني قۇندىلىقتار ۇمىت بولىپ بارا جاتىر. ال «تۋعان جەر» باعدارلاماسى وسى ولقىلىقتىڭ ورنىن تولتىرۋى قاجەت.

اۆتور: ارمان اسقاروۆ