حالىقتىڭ اۋىلدان قالاعا كوشكەنىن توقتاتۋ قاجەت - سەناتور بەكتايەۆ

استانا. قازاقپارات - «اۋىل» پارتياسىنىڭ ءتوراعاسى، سەناتور ءالي بەكتايەۆ «تۋعان جەر» باعدارلاماسى ارقىلى ۋربانيزاتسيانى توقتاتۋدى ۇسىنىپ وتىر، دەپ حابارلايدى قازاقپارات ءتىلشىسى.

«ۋربانيزاتسياعا كوپ ادام تابيعي نارسە رەتىندە قارايدى. نەگىزىندە، ءبىز ۋربانيزاتسيا دەگەندى توقتاتۋىمىز قاجەت. مەنىڭ ەڭ ۇلكەن ءۇمىتىم، وسى باعدارلاما اۋىلدىڭ تۇرمىس- تىرشىلىگىن جاقسارتىپ، ەل سول جەردەن كوشپەيتىندەي جاعداي تۋعىزادى دەپ ويلايمىن. ولاي بولسا، ءبىز سول اۋىلدىڭ تۇرعىندارىنا جاعداي جاساۋىمىز قاجەت، اۋىلدا ەڭبەك ەتەتىن جاعداي جاساۋىمىز قاجەت، اۋىلدا جاقسى ءبىلىم الاتىن مۇمكىندىك بەرۋىمىز كەرەك. پرەزيدەنت ۇسىنعان باعدارلامانىڭ تۇپكى ماقساتى وسى بولادى دەپ ويلايمىن»، - دەدى بەكتايەۆ بۇگىن ەفيرگە شىققان «1 ستۋديا» باعدارلاماسىندا.

 ايتا كەتەيىك، باعدارلاماعا دەپۋتات بەكبولات تىلەۋحان دا قاتىسىپ، جاستارعا قازىرگى جەتىستىكتەردىڭ قانداي ەڭبەكپەن كەلگەنىن كەڭىنەن ءتۇسىندىرۋ كەرەكتىگىن جەتكىزدى. ال قوعام قايراتكەرى، ساياساتتانۋشى بەرىك ءابدىعاليدىڭ ويىنشا، بۇگىندە ءبىلىم سالاسىندا تەحنوكراتيالىق ۇستانىم باسىم بولىپ كەتتى. سونىڭ سالدارىنان رۋحاني قۇندىلىقتار ۇمىت بولىپ بارا جاتىر. ال «تۋعان جەر» باعدارلاماسى وسى ولقىلىقتىڭ ورنىن تولتىرۋى قاجەت.

اۆتور: ارمان اسقاروۆ