اقتوبەدە كوپقاباتتى ۇيلەردىڭ قابىرعاسىنا سۋرەتتەر سالىنا باستادى - فوتو
جەرگىلىكتى اكىمدىك قالا كوركىنە ءسان بەرۋ ءۇشىن الماتىلىق سۋرەتشىلەردى شاقىردى، دەپ حابارلايدى قازاقپارات ءتىلشىسى. اقتوبەدەگى كوپقاباتتى تۇرعىن ۇيلەردىڭ سىرت كەلبەتىن وزگەرتۋ ءۇشىن الماتى قالاسىنان ەكى سۋرەتشى كەلدى.
ەرجان تانايەۆ پەن اققالي زاكيروۆ قازىر اقتوبە قالاسىنداعى ساڭكىباي باتىر داڭعىلىندا ورنالاسقان 9 قاباتتى تۇرعىن ءۇيدىڭ سىرتىنا قوناقجاي قازاق بويجەتكەننىڭ سۋرەتىن سالىپ جاتىر. «ءبىز جۇمىستى ءبىر اپتا بۇرىن باستاعان ەدىك. كەيىن جەل بولدى، جاڭبىر جاۋدى. قاتتى جەل بولعان كەزدە بوياۋ ۇشىپ، سۋرەتتى سالۋعا كەدەرگى كەلتىردى. ءارى ءبىز قاراپايىم سۋرەتشىلەرمىز. بيىكتە جۇمىس ىستەۋ قورقىنىشتى. قازىر اۋا رايى كەرەمەت. سۋرەتتىڭ نەگىزگى جۇمىسى اياقتالدى. الداعى ۋاقىتتا كەلىنشەك كيگەن كامزولدىڭ ويۋ-ورنەكتەرىن سالىپ، جانىنداعى مەشىت پەن شاقىراق بەينەلەنگەن قالانىڭ كورىكتى جەرىن اياقتايمىز. بۇل جەر ۇشاقتا جاقسى كورىنەدى ەكەن. قوناقجايلىلىقتى ءبىلدىرۋ ءۇشىن وسى تۇرعىن ءۇي تاڭدالعان. يدەيا جەرگىلىكتى اكىمدىكتىكى»، - دەيدى ەرجان تانايەۆ.
ەكى سۋرەتشى، ەرجان تانايەۆ پەن اققالي زاكيروۆتى اقتوبە قالانىڭ اكىمى ءىلياس يسپانوۆ شاقىرىپ، ۇلكەن جوبانى بىرلەسە اتقارۋعا كەلىستى. الداعى ۋاقىتتا قالادا تۇرعىن ۇيلەردىڭ قابىرعاسىنا تاعى بىرنەشە سۋرەت سالىنۋى مۇمكىن. ەلباسى نۇرسۇلتان نازاربايەۆتىڭ جولداۋىنا ارنالعان سۋرەتتى، ۇلى وتان سوعىسىنىڭ باتىرى ءاليا مولداعۇلوۆانىڭ پورترەتى مەن سپورت تاقىرىبىنداعى بىرنەشە تۋىندىلاردى وسى سۋرەتشىلەر سالادى.
«اقتوبەنىڭ ۇيلەرى ءبىر- بىرىنە ۇقساس كەلەدى ەكەن. مۇنداي سۋرەتتەر سالىنسا، ادامدار اۋداندى، جولدى تەز اجىراتا الادى. ءارى بۇل ەلىمىزدە دامىماعان ونەر سالاسى. ستريت- ارت باعىتىنداعى سۋرەتتى سالۋ ءۇشىن الدىمەن ەمۋلسيامەن اكتەپ الدىق. كەيىن رەسەيدەن اكەلىنگەن بوياۋعا تولى باللوندى پايدالانىپ جاتىرمىز. سۋرەتتى جىل سايىن جاڭارتۋدىڭ قاجەتى جوق. ءبارى اۋا رايى مەن كۇن ساۋلەسىنە بايلانىستى. سۋرەت 3-5 جىلعا شىدايدى»، - دەيدى ەرجان تانايەۆ.
ەلىمىزگە ستريت- ارت ونەرىن اكەلىپ، دامىتىپ جۇرگەن ەكى ەرجان تانايەۆ پەن اققالي زاكيروۆ الماتىداعى ورال تاڭسىقبايەۆ ساندىك- قولدانبالى ونەر كوللەدجىن، ت. جۇرگەنوۆ اتىنداعى ونەر اكادەمياسىن بىتىرگەن. سۋرەتشىلەر وداعىنىڭ مۇشەسى.
«مايلى بوياۋمەن سۋرەت سالۋ حوببيمىزگە اينالدى. نەگىزىنەن پوليگرافيا، ياعني، كوركەم جازۋمەن اينالىسامىز. ديزاينەرلىك باعدارلامالاردى بىلەمىز. ال ستريت- ارت كوشەدەگى سۋرەت بولعانىمەن، بۇل ادامدى ونەرگە شاقىرادى. كەنەپكە سالىنعان سۋرەت مۋزەيدە، جەكە ادامنىڭ ۇيىندە تۇرادى. ارنايى كورمەسە، ول سول كۇيى تۇرادى. دالادا سالىنعان سۋرەتتى وتكەن- كەتكەننىڭ ءبارى كورەدى. حالىق ونەرىڭدى باعالايدى. اقتوبەلىكتەر جاقسى اسەردە. ءتىپتى اەروگرافياعا قىزىعاتىن قىز كەلىپ، حابارلاستى. الەۋمەتتىك جەلىلەردى دە باقىلاپ وتىرمىز. ءبارىنىڭ پىكىرى جاقسى»، - دەدى ەرجان تانايەۆ.
ايتا كەتەيىك، اقتوبەدەگى بىركەلكى ۇيلەردى الدىمەن ەلباسى نۇرسۇلتان نازاربايەۆ سىناپ، كەيىن وبلىس اكىمى بەردىبەك ساپاربايەۆ جاڭا ءادىس- تاسىلدەردى پايدالانۋدى تاپسىردى.
اۆتور: التىناي ساعىندىقوۆا
Kazakhstan. Aktobe. 9 stages #9stages #process #graffiti #streetart #mural #muralart #art #aktobe
